Stacy's Penitence Music Video thar 'Withered'

Kum li zet music video an siam tawh loh hnuah Stacy's Penitence chu music video thar nen an rawn inlan leh ta a, Nilaini zan khan an YouTube channel-ah an music video thar  'Withered' chu mipuite en theih turin an chhawpchhuak.

'Withered' hi an vocalist Jeremy phuah a ni a, video hi Matthew Sailo(Pupu-a) buaipui sak a ni thung. Recording hi an guitarist Bobo Renthei home studio-a an tih a ni bawk. Tun ṭuma an hla thar rawn tihchhuah hi a bengchheng chi a ni ta lo deuh a, hemi chungchanga Vanglaini zawhna chhangin vocalist Jeremy chuan a hmaa an music play ṭhin- Metalcore/metal kha an kalsan ta ni loin genre hrang hrang experiment an duh vang tih a sawi. Music inthlak zel kara hmasawn ve zel nan genre hrang an khawih ve bawk a ni. "Kal khat deuh nih kan duh lo bawk," tiin Vanglaini a hrilh.

Scavenger Rock Idol winner band hi hun rei tak an mimal thil avangin reh deuh tawh mah se tunah chuan active deuh zawka hmalak an tum tawh a, album-te pawh buaipui an tum deuh tih Vanglaini an hrilh a ni. An band combination a ṭha bawka an hla thar 'Withered' hi a hla mai piah lamah a music pawh a mawi lehpek hle.