Terminator: Dark Fate-ah Edward Furlong kan hmu leh dawn

Terminator 2: Judgement Day avanga tleirawl hoin an ngaihzawn rawn Edward Furlong chu Terminator movie thar tur Dark Fate-ah kan hmu leh dawn.

Terminator producer James Cameron chuan John Connor lemah Edward Furlong a chan leh dawn thu a sawi. Edward Furlong hi Judgement Day-ah khan chang thiamin chang fuh hle mah se Terminator sequel dangah a chang zui tawh lo. Terminator 2 kha 1991-a chan a ni a, a dawttu Terminator 3: Rise of the Machines kha 2003-a chan a ni chauh thung.

Terminator 3-ah khan John Connor khan Judgement day kha a titawp thei ta lo a, a tikhawtlai ringawt kha a ni. James Cameron chuan Ter­minator film thar ber tur hi Judgement Day chhunzawmna chiah a nih thu a sawi a, hemi a nih avang hian he film hian ngaihven a hlawh zual hle.

Cameron chuan Furlong hian John-a role a play dan tur hi a sawichiang duh lo a ni. Terminator: Dark Fate-ah hian Arnold Schwarzenegger pawh kan hmu leh ngei dawn a, Linda Hamilton pawh a inlan leh dawn tih a chiang tawh bawk.

Terminator fan-te tan chuan heng mi pathumte inlan leh tur hi thil lawmawm tak a ni ngei ang. He movie hi Tim Miller direct a ni a, a siamna atan hian USD maktaduai 160-200 vel zet sen nia chhut a ni a, November 1 hian tlangzarh hman an tum a ni.