Sorkarin TikTok leh Helo Apps-te vau
Ministry of Electronics and Information Technology (MeitY) chuan Nilaini khan Tiktok leh Helo Apps operator-te hnenah zawhna zawtin - an Apps hmang hian India duh lohna leh dan loa chetna ang chi a awm ṭhin em tih an zawt a, chhanna an pek loh chuan India-ah 'ban' an nih tur thu a sawi. India hi TikTok leh Helo market lenna ram zinga mi a ni.
Heng apps pahnihte hnenah hian Ministry leh Cyber Laws and e-Security wing of MeitY chuan zawhna 21 an pe a, chhanna mumal an pek theih loh chuan IT Act leh Law dang behchhanin an khin tur thu an sawi. Zawhna hrang hrang an pek zingah hian phalna tel loa data tlangzarh chungchang te, anti-national activities atan hman a nih leh nih loh chungchang te leh Helo Apps-in sum tam tak sengin social media dangah politics rawngkai advertisment a neih ṭhin chungchang leh thildangte a ni. July 22, Thawhṭanni ral hmaa chhanna pe turin sorkar hian a ti a, chhanna an pek loh chuan sorkar hian a ṭul anga hma lain a 'ban' dawn.
TikTok leh Helo lam hian thuchhuah siamin India sorkar chu ṭha taka a thawhpui thu leh Digital India tihhlawhtlinnna tura an tel ve chu an lawmthu te an sawi a, sorkar nena ṭha taka thawhho zel an tum thu an sawi bawk.