Spider-Man 3 official title No Way Home

Tom Holland channa Spider-Man 3 official title tur chu a chiang tawh a, Spider-Man: No Way Home tih a ni dawn.

Thawhlehni khan Spider-Man star pathum Tom Holland, Zendaya leh Jacob Batalon-te chuan social media-ah fiamthuin Spider-Man 3 official title tur ni awm tak tak an post hlawm a, Spider-Man 3 thlalak hmasa ber, an pathuma an thlalak chu pholang vekin Spider-Man: Phone Home, Spider-Man: Home Slice, leh Spider-Man: Home-Wrecker tihte an post a, mahse heng zawng zawng hi chu fan-te an fiamna vek a ni.

Tom Holland chuan Nilaini khan Instagram-ah an pathum lanna video tho post-in hetah hian Spider-Man: No Way Home chu an film thar tur official title tur a nih thu a tarlang ta a ni. Sony Pictures leh Marvel Studios thawkdun hian Spider-Man title-ah hian 'home' tih thumal hi dahtel ngei ngei an tum niin a lang. Tom Holland-a channa Spider Man hmasa ber kha Spider-Man: Homecoming tih niin kum 2017 khan an tlangzarh a, a chhunzawmna kum 2019-a tlangzarh kha Spider-Man: Far From Home tih ni lehin tuna an tihchhuah thar leh tur pawh hi Spider-Man: No Way Home a ni leh.

Spider-Man 3 hian hun eng emaw lai aṭang khan chanchin a ngah hle a, The Amazing Spider-Man 2-a misual Jamie Foxx-a Electro leh Tobey Maguire-a Spider-Man 2-a misual Alfred Molina-a Doctor Octopus an inlan dawn niin sawi a lo ni tawh a, chumai a la ni lo Spider-Man hmasa pahnih Tobey Maguire leh Andrew Garfield-te pawh an inlan dawn te an ti bawk a, heng hi a dik leh dik loh chu film tlangzarh hunah a chiang ang. Spider-Man: No Way Home hi kumin December 17-a tlangzarh tur hian an ruahman a, film dang angin tlangzarh hun hi an sawn mai ang tih erawh a hlauhthawnawm hle.