Amtea ft Zorinsanga Sailo a hnai

Mizo mipa Gospel singer zinga huhang ngah ber zinga mi Amtea leh Zorinsanga Sailo te chuan hla thar an tichhuak dun dawn a, music video shooting pawh zo fel tawhin thlira ngaihthlak theih turin an dah chhuah thuai beisei ang.

An hla thar tihchhuah tur hi 'Ka beiseina Isua' tih a ni dawn a, Crowder feat. Tauren Wells 'All my Hope' Mizo ṭawnga lehlin niin Amtea lehlin hi a ni nghe nghe.

HC Recording, Venghnuaiah recording tiin video chu Biliwaif kut chhuak a ni dawn thung. Amtea leh Zorina zaithiam zia hi sawi nawn a ngai lo a, anni pahnih meuh thawk dun chu ngaihthlak a manhla hle turah beisei ila kan beisei thlawn lo ang. Amtea hian kumin hian project neuh neuh a neih nual thu Vanglaini a hrilh a, chumi avang chuan kumin chhung chuan hla thar a tihchhuah nual a rinawm. A 'original' hla tihchhuah a tum hnai bawk a ni.

Mafela (Durtlang) hlate music video album-ah anni pahnih hi an tel ve ve bawk a, chuvang chuan an solo music video thar pawh kan hmu hnai ve ve mai thei.