Emma Watson-in lemchan chawlhsan a tum lo

Emma Watson-in lemchan chawlhsan a tum niin thuthang a awm zet a, mahse a manager chuan hei hi thu dik a nih loh thu a sawi thung.

Harry Potter film series-a Hermione Granger lem a chan vanga khawvelin a hmelhriat Emma Watson hian a ngaihzawng Leo Robinson bula a awm theihna turin lemchan a chawlhsan dawn niin media ṭhenkhat chuan an tarlang a, mahse a manager Jason Weinberg chuan Entertainment Weekly hnenah he thuthang hi a dik lo tih nemnghetin,"A(Watson) social media account chu titawp mah se a career erawh a titawp lo," a ti.

Lemchan a chawlhsan dawn niin Daily Mail chuan thu an dawng tih an tarlang a, "Mi hmuhah a inlan lo a, Leo bulah a inbengbel mek. Chhungkaw din a duh tawh a ni mai thei," tiin an thudawn an ziak a, mahse hei hi Jason Weinberg  chuan a dik lo tih a rawn nem nghet ta a ni.

Emma Watson leh Leo Robinton-te hi kum 2019 aṭang khan an inzui tawh a ni. Watson hi Harry Potter film pariatah khan a chang vek a, kum 2019-a Little Women-a a chan bak kha chu a channa film dang tihchhuah a ni tawh rih lo.