Oscar Award-ah Queen + Adam Lambert perform dawn

British rock band lar Queen te chu film khawvela chawi­mawina ngaihhlut ber Oscar Award-ah an perform dawn a, he hunah hian American singer Adam Lambert pawh kan hmu dawn. Lambert hian kum 2011 khan Queen hi a zawm a, tunah chuan an vocalist rinrawl ber a ni mek. 

Oscar Award-a Queen te inlan tur thu hi Academy Awards chuan Twitter kal­tlangin an puang a, a boruak a lian nghal hle. Queen leh Adam Lambert-te hming hi a lan leh tak avang hian ngaihventu pawh an pung a, film mai ni lo music industry thlenga titi pui ber pakhat a ni mek.  

Oscar Award-a perform hi zaithiam tam takte 'dream' a ni a, stage luah pha chinte pawh khawvel hup pawha a ṭha ber berte an ni ṭhin. Kumina inlan turte pawh a ṭha ṭhe ṭhaw hle a, Queen-te pawh an phur tawh hle. 

British rock band-te hian an perform tur thu puan a nih hnu hian an Twitter account-ah 'We will rock The Oscars' tih an post a, fans lam pawh an chawk phur hle. Adam Lambert pawhin he thu vek hi a post ve nghal bawk a, hmun hrang hranga an lo perform ho tawhna video-te pawh an tarlang nasa hle a ni. 

Kum 37 mi Adam Lambert hi kum 2009 khan Queen original member Brian May leh Roger Taylor-te nen a vawi khat nan American Idol-ah an lo perform ho tawh a, an tir aṭang phatin an combination a ṭha hle. 

'Time of Miracles' singer hian 2011 khan  Queen  hi a zawm nghal a, 2012-ah tour an nei zui nghal bawk. Kum 2013 khan  iHeartRadio Music Festival, Las Vegas-ah an perform a, 2014 khan 'Queen + Adam Lambert North American Tour' an nei leh bawk. 

Hemi kum vek hian Aus­tralia leh New Zealand lamah tour an nei zui leh a, South Korea leh Japan-ah te show an nei leh bawk. Heng bakah hian Europe leh South America lamah te an concert ho leh bawk a, hmun hrang hrangah band angin an che chhuak ta zel a ni. 

Adam Lambert hi tunah chuan Queen vocalist nghet a ni ber tawh a, Oscar Award-a an perform zawh hnu hian July - August chhungin 'The Rhapsody Tour' an nei leh dawn bawk a ni.

Nikum October thla khan drama/biography film hit tak mai 'Bohemian Rhapsody' tichhuah a ni a, he film hi Bri­tish rock band 'Queen' beh­chhana siam hi a ni. He film-ah hian Adam Lambert pawh hi a changtu zingah a tel a, an band guitarist Brian May leh bassist John Deacon-te pawh an inlan a ni. 

Bohemian Rhapsody hi Oscar Award nominee puan a nih khan a langsar berte zinga mi niin, category pang zetah a lang. 

Chung zingah chuan award ngaihlut tak tak - Best Picture, Best Actor leh Best Film Editing-te pawh a tel a, chawimawina an dawng a nih ngat chuan a ropui leh zual ngei ang. 

Oscar Award hi February 24 khian a vawi 91 nan Dolby Theatre, Los Angeles-ah sem a ni dawn a, ABC chuan live-in an pechhuak dawn a ni. Kan ram hunah chuan Thawhṭanni zing lamah en theih a ni ang. 

Queen bakah hian - Ameri­can singer Jennifer Hudson, Lady Gaga leh Bradley Cooper-te chu perform tur zingah an tel a ni.