Oscars host ka phu- The Rock

American actor Dwayne 'The Rock' John­­­­son chuan film lama chawimawina sang Oscar Award host tura mipuiin an duh ber a nih thu leh host tura a tlin tawk thu a sawi chhuak mauh mai! 

Oscar Award hi film khawvela chawimawina ngaihhlut ber a ni a, kumin­ah erawh kum 30 hnuah a vawi khat nan host awm loin sem a ni dawn. American comedian Kevin Hart hmunruak luah tur pawh an inrinsiak laih laih hman a, a tawpah erawh host awm loa sem an titlu ta a ni. 

Hemi chungchang hi The Rock chuan sawi chhuakin, "Academy Award te nen inremna kan siam hman ṭhelh a, an first choice pawh ka ni. Mahse eng emaw avangin kuminah chuan ka inlan dawn ta lo a ni," tiin a sawi a, nakkum lamah chuan a host tawh ngei a beisei thu fiamthuin a sawi zauh bawk. 

'Baywatch' star chuan Oscar host tura mipuiin an duh ber a nih thu a sawi bawk a, amah pawhin awm bera a inhriat thu a sawi. Kum 46 mi hian a hun a herchuak a nih ngat chuan chanchin chhinchhiah tlak tak a hnutchhiah tur thu a sawi bawk a, Oscar a host chak hle tih a lang.  

Oscar Award hi Feb­ruary 24 khian Dolby Theatre, Los Angeles-ah sem a ni ang.