Bollywood-ah Pakistani tan hmun a awm lo!

All Indian Cine Workers Association (AICWA) chuan Pakistan mi leh sa tan Indian film industry-ah hmun a awm lo tih an sawi a, dan zawm lote chu na taka hrem an nih tur thu an puang riap mai!

He thuchuah hi tun hnaia Jammu & Kashmir-a helten India sipai ṭhahnem tak an thah vanga a ni a, Pakistan chu mawhphurtu-ah an ngai a ni. Hei vang hian AICWA chuan Pakistan mi leh sate tan Bollywood-ah hmuh a awm tawh lo tih an sawi a, lo chhawrluite pawh na taka hrem an nih tur thu an tarlang a ni. 

Hei hian actor, singer leh technician-te pawh a huam a, Pakistan mi leh sa hrim hrim tan chuan Indian film industry-ah hmun a awm lo a ni ber. Hei hian Bollywood-a hriat hlawh tak tak - Fawad Khan leh Mahira Khan-te pawh a nghawng dawn. Pakistani actor Fawad Khan hi Bollywood-a chawimawina ngaihhlut Filmfare Award-te pawh lo dawng tawh a ni a, Mahira Khan pawh sulhnu nei ṭha berte zinga mi a ni. Pakistani singer Atif Aslam leh musician Rahat Fateh Ali Khan-te pawh a tuartu zingah an tel dawn a ni.