Box Office-a roreltu Alita: Battle Angel

Tun hnaia sci-fi film chhuak thar Alita: Battle Angel chuan 'President’s Day' weekend-ah sum a lalut hnem ber a, Box Office-ah roreltu a ni. 

 

He fantasy/science fiction film hian kar liamta chhung khan $mtd 28 zet a lalut a, The LEGO Movie 2  chuan a hnaih ber a ni. Isn't It Romantic chu top 3-ah a inhlangkai a, What Men Want leh Happy Death Day 2U te chu sum lalut tam zual zingah an tel bawk. 

American actress Rosa Sala­zar leh Austrian-German actor Christoph Waltz te channa Alita: Battle Angel hi Valentine's Day, February 14 khan tlangzarh a ni a, a hit nghal hle. Kum 33 mi Rosa Salazar hian Alita role a play a, Christoph Waltz chu Dr. Dyson Ido lemah a chang thung a ni. Alita: Battle Angel hi Robert Rodriguez chuan a direct a, James Cameron chuan a produce thung a ni. 

Alita hi a hit tih loh rual a ni lo - ni li lek chhungin $mtd 28 zet a lalut thei a ni. Hei hi North America bikah chauh a la ni a, khawvel hmun dangah pawh chhuah chhoh mek zel a ni.

 

The Lego Movie 2: The Second Part hi kar hmasa lamah khan Box Office-ah roreltu a ni a, tun ṭumah erawh ngam loh a tawng ve ta. Sum lalut tam ber dawttu erawh a la ni pha tho a, $mtd 20 lai a thawkchhuak leh a ni. 

He animation film hi American film director Mike Mitchell kutchhuak niin, Hollywood star Jason Momoa, Chris Pratt leh Australian actress Margot Robbie te chuan aw an thawh a ni. 

Indian actress chhuanvawr Priyanka Chopra channa Isn't It Romantic chu February 13 khan tihchhuah a ni a, Box Office-ah pawh a che ṭha nghal viau. He film-ah hian Australian star Liam Hemsworth leh Rebel Wilson te nen an changho a, an sum lakluh tawh zat chu $mtd 14.2 a ni. 

Hetih lai hian tun hnaia film chhuak thar dang What Men Want chuan beisei a pha lo thung a, palina dinhmun a luah pha ṭawk a ni. Happy Death Day 2U chuan $mtd 9.4 lalutin pangana a hauh a, Cold Pursuit leh The Upside ten an dawt a ni. 

Vawi eng emaw zat pakhatna lo ni tawh Glass chu a sum lakluh tlahniam ve deuh tawh mahse top 10-ah a la in hamtang a, The Prodigy leh Green Book te pawh sum lalut tam zual zingah an lang phak bawk. 

1. Alita: Battle Angel - $28

2. The LEGO Movie 2 - $20

3. Isn't It Romantic - $14.2

4. What Men Want - $10.6

5. Happy Death Day 2U - $9.4

6. Cold Pursuit - $5.9

7. The Upside - $5.4

8. Glass - $3.9

9. The Prodigy - $3.1

10. Green Book - $2.8