Lady Gaga leh Christian Carino an inṭhen?

American singer La­dy Gaga leh a kawppui Chris­tian Carino-te chu an inṭhen a, an inhualna pawh an titawp nghal niin khawthlang media-te chuan an tarlang. 

Lady Gaga thu­puang­tu chuan an inṭhen thu hi a nemnghet tawh a, thu chiang tak erawh a tar­lang lo thung. Kum 32 mi Lady Gaga leh talent agent Carino (49)-te hi kum 2017 aṭang khan an inzui ṭan a, nikum October khan an inhual thu an puang. An beisei anga thil a kal tluang tak si loh avangin, an inhual aṭanga thla tam pawh a liam hmain an inṭhen thu puan a ngai leh ta zawk a ni. 

'Always Remember Us This Way' singer Lady Gaga hian a hmain Ameri­can actor Taylor Kinney chu a lo inhualpui tawh bawk a, a ṭum hnih nan a hlawh­chham leh ta a ni. Taylor Kin­ney nen hian kum ruk zet an inzui hnuah 2016 khan an inṭhen a, Christian Carino lam hi a hawi zui ta a ni. 

Christian Carino nen an inkar a tawp leh tak avangin hmangaihna zin kawng chhuk chhoah a insawh leh rih a ngai dawn a nih hmel a, a kum a tam ve tak deuh avangin a chanchin hian ngaihven a hlawh zual hle a ni. 

Lady Gaga hi 'A Star Is Born'-a a chanpui Bradley Cooper nen sawizawm an ni a, thu chiang erawh hriat tur a awm lo. Hetih rual hian American actor lar Cooper hi Russian supermodel Irina Shayk pasal a ni tih hriattel a ṭha a, khual thuthang mai a ni thei tihna a ni.