Fashion designer ropui Karl Lagerfeld a thi
German fashion designer ropui Karl Lagerfeld chu Thawhlehni zan khan Paris-ah kum 85 mi niin a thi. A thih thu hian khawvel a dengchhuak hneh hle a, uitu pawh a ngah hle a ni.
Vogue magazine editor-in-chief Anna Wintour chuan, "Khawvel mipa ropui berte zinga mi kan chan ta," tiin a sawi a, Italian fashion designer lar Donatella Versace pawhin Karl Lagerfeld a ui thu a sawi chhuak bawk.
Karl Lagerfeld hi fashion industry-ah chuan sulsutu pawimawh berte zinga mi a ni a, a thih ni thleng hian Chanel and Fendi-ah creative director hna a thawk a ni.
Lagerfeld hian a taksa lamah harsatna a tawh avangin tun hnaiah hna a thawk tam lo a, January thla-a Chanel summer show-ah pawh khan a inlan lo. A thih ni hian zing lamah hospital-ah dah luh niin, zan lamah a chat thla zui ta a ni.
German model Claudia Schiffer chuan, "A awm ta lo mai hi mak ka tiin, pawi ka ti tak zet a ni. Karl Lagerfeld hi chuan black & white pawh mawi takin a chhuah thei a - tuman an a hmun ruak an luah zo lovang," tiin, fashion industry tana a hna thawh chu ropui a tih thu a sawi uar hle. Victoria Beckham, actress Diane Kruger leh model Gigi leh Bella Hadid te pawhin Karl Lagerfeld hna thawh chu ropui an tih thu leh an ui thu an sawi a, US First Lady Melania Trump pawhin White House-a a inlan hmasak ber ṭuma Lagerfeld a kutchuak a inbel chu Twitter lamah amah sun nan a tarlang ve bawk.
German creative director lar Karl Lagerfeld hi fashion designer a nih bakah, artist, photographer leh caricaturist a ni tel bawk. French fashion house Chanel-ah director niin, Italian fashion house lar Fendi dintu a ni. Fashion label ṭhahnem tak a din a, chung zingah chuan - Chanel, Karl Lagerfeld, Jean Patou leh Falabella te pawh a tel a ni.