Pokémon-in kum 25 a tling ta Pokémon open-world game a awm dawn

Khawvela anime leh gaming franchise hlawhtling ber pawl Pokémon chuan Inrinni khan kum 25 a tling. 

Pokémon tih hming sawilan hi chuan ṭhalai, a bikin 90's kids ho lung a tileng ngei ang. Kum 1995 khan Japanese video game designer Satoshi Tajiri chuan a siam chhuak a, February 27, 1996-ah Nintendo chuan tlangzarhin a game Pocket Monsters: Red and Green hmangin bul an ṭan a, Inrinni kha a kum 25 na chiah a ni ta a ni.

Game, manga leh anime-a siam a nih bakah kum 2018 khan live-action movie Pokémon Detective Pikachu chu siam a ni bawk a, tunah hian khawvela media franchise hlawhtling ber leh sum lalut tam ber pawl a ni mek.

Khawvel ram hrang hranga Pokémon fan-te chuan uar takin Kum 25 a tlin hi an lawm a, news agency lar tak tak pawhin Pokémon kum 25 tlin hi an tarlang uar hle.

Kum 25 an tlin lawmna pual hian The Pokémon Company chuan Zirtawpni khan thu lawmawm tak an puang a, gamer-te tan chuan thu hriat nuam tak tur a ni.

Kumin kum tawp lamah hian game pahnih Pokémon Brilliant Diamond leh Shining Pearl-te an tlangzarh dawn. Heng game pahnih hi Pokémon Diamond and Pearl an siam thar leh niin Nintendo Switch platform-a khelh tur a ni dawn.

Chumai chu a la ni lo, open world RPG game Pokémon Legends: Arceus chu nakkum kum tirah an tlangzarh dawn bawk. Hei pawh hi Nintendo Switch-a khelh tur tho a ni dawn. Heng game trailer-te hi an tichhuak nghal bawk a, Pokémon Legends: Arceus hi  Sinnoh region-ah set a ni dawn tih a hriat theih tawh a, Pokémon fan, gamer ni bawkte chu thuk zawkin Pokémon khawvelah an lut thei dawn a ni.