Inter Branch KṬP Quiz result puan a ni Logo insiamsiak result puang nghal

Central KṬP-in Kristian Ṭhalai chanchinbu kum 50 tlin lawm nana Inter Branch KṬP Quiz a buatsaiha Elimination Round Result chu nizan khan Synfo Studio, Synod Office-ah puan a ni.

Elimination Round-ah hian district hrang hrang aṭangin Branch 133 an tel a, an zing aṭang hian mark hmu sang Branch 20-te chu Semi Final intihsiak hmachhawn turin an tling. 

Elimination Round result puan­naah hian Kristian Ṭhalai chanchinbu Golden Jubilee puala hman tur Logo insiamsiak result puan nghal a ni bawk. Logo insiamsiakah hian mi 27 ten design hrang hrang 37 an thehlut a, lawmman dawngtu hi Lalthanmawia, College Veng, Aizawl a ni a, Rs. 2,000 a dawng.

Inter Branch KṬP Quiz Semi Final hi August 22 zan khian Dawrpui Kohhran Centenary Hall-ah neih a ni dawn a. Bible aṭangin Luka, Timothea I, Timothea II leh Ephesi te intihsiak nana hman a ni ang a, hei bakah hian KṬP chanchin, Mizoram Presbyterian Kohhran chanchin leh Kristian Ṭhalai chan­chinbu aṭangtein intihsiak tur a ni.

Quiz-ah hian pakhatnain Rs. 1,00,000, pahnihnain Rs. 40,000, pathumnain Rs. 20,000 bakah trophy leh citation an dawng ang. Palina leh pangana ten Rs. 5,000 leh citation leh, Semi Finalist ten Rs. 2,000 leh citation an dawng bawk ang. Semi Final leh Final-te hi Hruaina Êng channel-ah Live-a pek chhuah tur a ni.