HopperHQ - Instagram rich list: Kylie hausa ber, follower ngah ber C. Ronaldo

27th July, 2019

HopperHQ-in instagram rich list 2019 a tihchhuahah American model leh reality TV star Kylie Jenner chuan a kum zawnin hausa ber nihna a hauh. Hetihlai hian footballer, Portugal captain Cristiano Ronaldo chuan follower ngah berin maktaduai 172 a nei.

Rich list-a milarte hian sponsor post aṭangin sum an lalut ber a, an lakluh pawh a tam tham hle. Kylie Jenner hian vawi khat post aṭangin $1,266,000, (Rs. vbc 8.73) zel lalut anga chhut a ni a, hma a hruai fal hle. Kylie hian follower maktaduai 139 zet a nei a, IG- aṭang ringawt pawh hian hausakpui lawih tham sum a lalut a ni.

Arianna Grande chuan pahnihna dinhmun hauhin vawi khat post a siamah $99,600 (Rs. vbc 6.87) zel a lalut. Portugal captain hi pathumna niin vawi khat post-ah $975000 (Rs. vbc 6.72) zel a lalut a, Selena Gomez chu pangana a ni ve bawk. 'Queen of Instagram' an tih mai American singer Selena Gomez hian thla thum chuang zet Instagram account a tihtawp vangin a dinhmun hi a hniam phah niin a lang.

Film star zinga sum lalut hnem ber chu WWE superstar hlui Dwayne 'The Rock' Johnson a ni, parukna dinhmun a luah. American actor hian a larna chu chawr ṭangkaiin post pakhat a siamah $8,82,000 (Rs. vbc 6) zel a lalut thei a ni.

Rich list top 100-ah hian India mi pahnih langin Bollywood aṭanga Hollywood a insawn Priyanka Chopra chu 19-na a ni a, vawi khat post-ah $271,000 (Rs. vbc 1.87) a lalut a, India cricket captain Virat Kohli chu 23-na niin $1,96,000 (Rs vbc 1.35) a lalut.

IG aṭanga sum lalut hnem zual top 10-ah hian USA aṭangin mi pariat an langa, South America leh Europe aṭangin pakhat veve an lang bawk.

Sum lalut hnem (per post) Top 10

1 Kylie Jenner $1.2m (139m follower)

2 Ariana Grande $996,000 (158m follower)

3 Cristiano Ronaldo $975,000 (172m follower)

4 Kim Kardashian $910,000 (142m follower)

5 Selena Gomez $886,000 (152m follower)

6 Dwayne Johnson $882,000 (147m follower)

7 Beyonce Knowles $785,000 (128m follower)

8 Taylor Swift $748,000 (118m follower)

9 Neymar Jr $722,000 (121m follower)

10 Justin Bieber $722,000 (114m follower)