Mystical Mizoram Ṭhazual lengzem Ṭhazual award 2020 best duo pakhatna an ni

Mystical Mizoram Ṭhazual Lengzem chart-ah nikum Ṭhazual award-a Best duo dawngtu Essy ft. Jt Production 'Min ui lo mi' chu pakhatna an ni.

Essy leh Jt Production-te hian nikum October thla laihawl velah khan an hla hit 'Min ui lo mi' hi an tlangzarh a, TV lama an tlangzarh hnuah MDM YouTube channel-ah an dah bawk a ni. YouTube-ah ringawt pawh nuai ruk chuangin an thlir tawh.

Music video a hmuhnawm a, Essy chevelin mit a titlai a; Jt Production pawhin zai mai ni lo a chham lam pawh a tithei tih a rawn lantir bawk nen, ngaihthlak nawn tluk tluk pawha ninawm loh tak a ni. He hla hi Jt-a phuah hi a ni nghe nghe a, music leh recording pawh ama kut chhuak vek a ni. Chart lehah pakhatna an la nih chhunzawm thei ang em tih hriat a chakawm tawh a, mimal ve ve pawha zaithiam lar tak ve ve thawkdun hian Zofate beng an titlai tih loh rual a ni lo.

Chart hmasaa pathumna Rachel Lalnunkimi 'Di ṭhen lunglen' chu pahnihnaah a rawn inhlangkai ta. Rachel-i hi a dinhmun a ṭha sawt hle. Mizo idol star hian pakhatna dinhmun hi a rap thei dawn em tih chu chart lehah kan hre theiin a rinawm.

Zorinzuali Khiangte 'O' chu Top 3-ah a rawn inhlangkai ta a, pathumna a ni. Tunlai zaithiam huhang ngah ber pawl Rebecca Lallawmsangi chuan a hla hit 'Dam dam' chu palina a rawn nihpui ve tawh bawk. Keimah Senes, Tlangval Tlumtea ft. Lil Me 'Mizo nula' chuan top 5 a rawn khar thung a ni.