Pokémon 25: The Album-ah

Inrinni liam ta khan Pokémon chuan kum 25 a tling ta a, hemi lawmna pual hian Inrinni zanah khan virtual concert buatsaih niin chutah chuan kumin favangah an kum 25 tlin lawmna pualin 'Pokémon 25: The Album' tlangzarh a ni dawn tih an puang.

Pokémon 25: The Album-ah hian hla 14 a awm dawn a, chung hlate chu Universal Music Group artist 11-te'n an sa dawn. Chung zingah chuan a hmaa puanzara lo awm tawh Katy Perry bakah J Balvin leh Post Malone-te pawh an tel.

Post Malone-a'n Hootie and the Blowfish hla Only Wanna Be With You a sak pawh he album-ah hian a tel dawn tih a chiang tawh a, Katy Perry leh J Balvin bakah artist hming la thupte chuan Pokémon franchise zulzui hlate an sa dawn bawk. Heng hlate hi music video kan hmuh ngei hmel bawk a, chumi rual chuan merchandise pawh an tlangzarh dawn a ni.

J Balvin chuan Inrinni khan P25 Music-a a tel ve thu sawi langin phurawm a tih tawh thu a sawi bawk. Inrinnia virtual concert an buatsaih hi Official Pokémon YouTube channel-ah en theihin an dah tawh nghe nghe a, hetah hian Post Malone animated concert hmuh tur a awm a, a hla hit hrang hrang chu Pokémon khawvelah a sa vel a ni. 

'Only Wanna Be With You' (Pokémon 25 Version) music video hi Pathianni khan Post Malone chuan a tlangzarh nghal bawk.