Lerisa Play-ah Bangla No. 9 en rawh le

February 20-ah khan kan en thei tawh dawn emaw kan tih hnuah 'technical' buaina a awm avangin tlangzarh hun sawn a ni a, tunah erawh en theihin a awm dawn ta tak tak e. Leitlang Pictures kut chhuak mini web series Bangla No. 9 chu vawiin tlai dar 3:30 aṭang hian en theihin a awm dawn ta.

Leitlang Pictures hian vawiin tlaiah hian Bangla No.9 an tlangzarh rualin an LERSIA PLAY application an tlangzarh nghal dawn a, he app kaltlang hian Bangla No. 9 pawh hi en tur a ni dawn a, Laptop emaw PC emaw aṭanga en duh tan chuan LERSIA PLAY website-ah a en theih dawn bawk.

Kar hnih vel liam taah khan Leitlang Pictures chuan Bangla No. 9 official trailer hi an tichhuak tawh a, en chak an tam tih social media comment hrang hrang aṭangin a hriat. Chung mite duhna chu vawiin tlaiah hian tihhlawhtlinin a awm dawn ta a ni.

Google play store-ah LERSIA PLAY application hi download tur a awm nghal dawn a, chu chu download la Bangla No 9 hi i duh hun hunah i hmet chhuak tawh mai dawn a ni. Mahse i sum tlem azawng erawh i chawi ve a ngai dawn thung a, quality chi li- Full HD, HD, SD leh Mobile-a en tur bika siam resolution a awm dawn. A quality-a zir hian a man a dang dawn a, Rs 200-500 inkar vel a ni dawn tih Mapuia Chongthu chuan Vanglaini a hrilh.

Bangla No. 9 hi horror suspense thriller lam hawi a ni dawn a, Zonet TV lama kan en tawh 'Rose' ziaktu Dr. Zarzoasanga script ziah bawk niin a changtu turte pawh Rose leh Mizo film danga kan hmelhriat tawhte an ni hlawm dawn. Episode paruk a awm ang.

LERSIA PLAY-ah hian Bangla No. 9 chiah hi dah a ni dawn lo. Leitlang Pictures kut chhuak film hrang hrang dah a ni dawn. Chuvang chuan Mizo film i duh tawkin he application kaltlang hian i en thei dawn tihna a ni.