BRIT Award sem a ni ta Dua Lipa leh Calvin Harris an langsar

Kum tina sem ṭhin music lama chawimawina sang BRIT Award chu Nilaini zan khan O2 Arena, London-ah sem a ni ta a, British singer Dua Lipa leh Dutch DJ Calvin Harris-te an langsar hle. 

'One Kiss' singer Dua Lipa leh Harris-te hian British Single award an la a, Dutch DJ chhuanvawr hian Producer of The Year chawimawina a dawng tel bawk. Bristish singer chhuanvawr Ed Sheeran pawh a hawi hil bik lo a, Global Success award hlan a ni. 

English pop rock band The 1975 chuan award ngaihhlut- British Album of The Year an la a, Little Mix chuan British Video award an la ve thung. Tom Walker kutah Bristish Brakthrough Act hlan a ni bawk. 

Award dawng zingah hian khawvel hupa zaithiam lar - Ariana Grande, Pink, Drake leh The Carters-te an tel a ni. 

Music huanga chawimawina ngaihhlut ber Grammy Award-ah Bristish singer Dua Lipa hi Best New Artist atan thlan a lo ni tawh a, an thlang sual lo tih BRIT Award-ah pawh a lang. 

Kum 23 mi Dua Lipa hian award hui ṭeuh lo mah se lawm a hlawh a, mimala langsar ber tih ngam a ni. Award ngaihlut British Single a lak bakah hian a perform bawk a, mipui chawk hlimtu ber pakhat a ni.  'New Rules' singer che vel hi a hmuhnawm lehpek hle a, red carpet lamah pawh mipui mit fukna a ni. 

English pop rock band lar The 1975-te hi kum 2002-a indin an ni a, tunah chuan British mai ni lo khawvel huapin hriat an hlawh tawh. BRIT Award-ah pawh an langsar a, award ngaihlut pahnih - British Album of The Year leh British Group-te an hui a ni. 

The 1975 hian nikum Novem­ber thla khan 'A Brief Inquiry into Online Rela­tionships' album an tichhuak a, hei hi British Album of The Year atan thlan a ni. 

He tih lai hian kum 21 mi Jorja Smith chuan British Female Solo Artist award a la a, ngaihven a hawh thar hle. 'Blue Lights' singer hi a kum a la naupan avangin a hmabak a eng hle a ni. Mipa lamah George Ezra chuan Bristish Female Solo Artist chawimawina hi a la thung a ni. 

Tom Walker chuan Brark­through Act a la a, Sam Fender kut­ah Critics Choice hlan a ni bawk.

 

BRIT Award-ah hian British khua leh tuite tan chauh lo pawh hmun a awm a, category hrang hrang a awm nual. International Group atan 'The Carters' thlan an ni a, Jay Z leh Beyoncé-te ropuina belhchhahin a awm zel. 

Canadian rapper Drake chu International Male Artist award hlan a ni a, hmeichhe lamah American singer Ariana Grande chuan he chawimawina hi a dawng thung. He hunah hian American singer Pink pawh chawimawiin a awm a, Outstanding Contribution To Music award hlan a ni. 

British Phonographic In­dustry buatsaih BRIT Award hi a ṭum 39-na a ni tawh a, kuminah hian zaithiam lar tak tak an inlan. The 1975-te perform a hmuhnawm a, Calvin Harris leh Rag'n'Bone Man te che tla vel a hmuhnawm hle. Sam Smith leh Dua Lipa-te chu mipui lawm an ni a, Little Mix ten an talent ṭhat zia an pholang bawk. 

British girl group lar Little Mix-te hian an hla hit 'Woman Like Me' an thlawh a, an perform a pui rem rem hle. Pink chuan award a dawn duh tawk mai loin a perform bawk a, lawm pawh a hlawh hle a ni. Pink hian a single thar 'Walk Me Home' a perform a, a che vel a hmuhnawm leh pek hle a ni. 

Award ceremony hi Jack Whitehall leh Clara Amfo-te chuan an host a, milar fuankhawm an ṭhahnem hle a ni. 

BRITISH ALBUM OF THE YEAR

    The 1975 – A Brief Inquiry into Online Relationships

BRITISH FEMALE SOLO ARTIST 

    Jorja Smith

BRITISH MALE SOLO ARTIST 

    George Ezra

BRITISH GROUP

    The 1975

BRITISH BREAKTHROUGH ACT 

    Tom Walker

CRITICS' CHOICE 

    Sam Fender

INTERNATIONAL GROUP

    The Carters

GLOBAL SUCCESS

    Ed Sheeran

BRITISH PRODUCER OF THE YEAR 

    Calvin Harris

OUTSTANDING CONTRIBUTION TO MUSIC 

    Pink 

BRITISH SINGLE 

    Calvin Harris & Dua Lipa - One Kiss

BRITISH VIDEO 

    Little Mix ft. Nicki Minaj - Woman Like Me

INTERNATIONAL MALE SOLO ARTIST 

    Drake

INTERNATIONAL FEMALE SOLO ARTIST 

    Ariana Grande