Samsung Galaxy S10 a book lawk theih
Samsung chuan an smartphone model chhuanvawr Galaxy S10 leh S10+ chu India ramah an tlangzarh ta a, pre-booking tih theih a nghal a ni.
South Korean company hian Galaxy S10 leh S10+ rual hian Galaxy Fold leh Galaxy S10e-te pawh an tlangzarh nghal a, Flipkart-ah pre-booking hawn nghal a ni. Hetih rual hian Samsung India chuan Galaxy S10, Galaxy S10+ leh Galaxy S10e-te hi March 8 vel aṭangin hralhchhuah an beisei thu an sawi.
Samsung model tharte hi India ramah engzatin nge an zawrhchhuah dawn a la hriat loh a, a man erawh a tlawm lutuk dawn lo. US-ah chuan Galaxy S10 bik hi Rs. 63,900 hu in an hralhchhuak a, India-ah pawh hetiang zat vel hi a nih a rinawm. Galaxy S10+ erawh Rs. 70,000 a kai hmel thung a, Galaxy S10e chu Rs. 53,300 velin a lei theih dawn a ni.
Galaxy S10 leh S10+ hian camera pathum a nei dawn a, a megapixel pawh a pangngai viau dawn a ni. Thlalak lama tui tan pawh a hman tlak viau dawn a, aperture hi 1.5/2.4 a ni ang.