Box Office-ah The Invisible Man a hrang nasa
Box Office-ah Sonic the Hedgehog-in um phak loh a nei ta a, The Invisible Man-in suam a lalut tam ber. Sonic the Hedgehog chu pahnihna la ni phak thoin The Call of the Wild chu pathumna a ni thung.
The Invisible Man a hrang nasa
Leigh Whannell horror film siam The Invisible Man chu beisei ang ngeiin Box Office-ah a hrang nasa hle a, theatre 3,610 aṭangin $28,205,665 lai a lalut. H. G. Wells lehkhabu ziah The Invisible Man behchhana siam niin, Elisabeth Moss, Aldis Hodge leh Storm Reid-te an chang a ni. Khawvel pumah $mtd 49.2 a lalut tawh a, film siamna atana an budget hi $mtd 7 chiah a ni a, an hlawk tawh hle.
The Invisible Man lehkhabu hi a rei tawh hle a, kum 1933 daih tawh khan The Invisible Man film hi tihchhuah a lo ni tawh nghe nghe. The Invisible Man (2020) pawh hi 1933-a tihchhuah tawh 'reboot' leh a ni. A lehkhabu phei hi chu 1897-a tlangzarh daih tawh kha a ni a, kum 100 chuang ral hnuah pawh a la chuai thei lo chu a ni ber e.
Sonic the Hedgehog a tlan chak ber ta lo
Sonic the Hedgehog chuan The Invisible Man a umpha ta lo a, mahse $16,261,393 lai a la lalut thei tho. The Invisible Man inlar tak avangin chart-ah pahnihnaah a awm a ngai ta a ni. The Call of the Wild chu pathumna ni ve bawkin $13,362,823 a lalut.
Anime film My Hero Academia: Heroes Rising chu Japan-ah chuan tlangzarhna rei deuh tawh mah se US-ah kar hmasa khan tlangzarh a ni chauh a, palinaah a rawn invawrh nghal. Bad Boys For Life chu pangana niin top 5-ah a la lang pha ve bawk a ni. Kum 2018 khan My Hero Academia: Two Heroes chu tihchhuah a ni tawh bawk a, hei pawh hian $mtd 27.5 lai a hmuchhuak a ni.
Box Office Top 10
1 The Invisible Man $mtd 28
2 Sonic the Hedgehog $mtd 16
3 The Call of the Wild $mtd 12
4 My Hero Academia: Heroes Rising $mtd 5
5 Bad Boys for Life $mtd 4.3
6 Birds of Prey: And the Fantabulous $mtd 4.1
Emancipation of One Harley Quinn
7 Impractical Jokers: The Movie $mtd 3
8 1917 $mtd 2.7
9 Brahms: The Boy II $mtd 2.6
10 Fantasy Island $mtd 2.3