0389 entu an ṭhahnem, 'audio' duhthusam lo
Zonet leh Believing.is.Seeing projek-in an buatsaih Mizo TV Series 0389 episode hmasa ber chu July 26 zan khan Zonet Zawlbukah a vawi khat nan tihchhuah a ni a, episode hnihna hi August 2, Zirtawpni zan dar 8:00-ah Zawlbukah bawk tihchhuah a ni leh ang.
0389 episode hmasa berah hian a changtunu Ashley (Christina Pautu) chuan a chanchin rawn sawi chhoin Zara (Vanlaltlansaa) nena an intawn chhoh dan a lang a, a hmuhnawm chho dawn chiaha a lan laiin tihtawp a ni - Zirtawpni zan a nghahlelhawm sawt.
WhatsApp leh Facebook lamah 0389 sawi chhunzawm a ni a, fakna ṭhahnem tak kara an sawiselna langsar ber chu 'audio' a ni. Producer leh director ni bawk Raymond Colney chuan, "Audio a fiah tawk lo kha pawi kan ti hle. Kan enfiah nghal a, kan siamṭha tawhah kan ngai. Episode hnihna aṭang chuan hriat a nuam tawh ang," tiin Vanglaini a hrilh.
0389 hi kan hriat ṭheuh angin Aizawl pin code a ni a, Aizawla thil thleng behchhana siam a nih avangin 0389 tih hi a series hmingah an hmang. Script writer Steven Ralte chuan, "Episode hnihnaah hi chuan Ashley nihna a rawn lang hnem lehzual dawn a, ani hi a hmel hmuh a nuam bawk nen entu lam pawh an mit a tlai chhoh ngei ka ring," tiin a sawi.
Zanin dar 9:00 hian 0389 episode hmasa ber hi Zonet Zawlbukah tihchhuah a ni leh ang.