Sonic Temple festival headline tur Red Hot Chili Peppers

Sonic Temple festival, Columbus, Ohio-a May 15-17 chhunga neih tuarah Red Hot Chili Peppers leh Tool-te chu show headline tur an ni dawn.

America rock music festival lianah hian Metallica chu a tirah headline tur an nih thu tarlan ni zet tawh mah se thrash metal icon-te hian  Sonic Temple leh Louder Than Life festival aṭangin an inhnukdawk tih thuchhuah siamin an tarlang a, hemi vang hian RHCP leh Tool-te hi headline tur an ni tih tarlan a ni leh ta a ni.

Metallica hi festival ṭan zanah leh tawp zanah show headline tura tih an ni a, mahse an theih tak loh avang hian RHCP chu show ṭan zana headline tur an ni ta a, Tool hi show tawp zana headline tura tih an ni ta bawk. May 16-ah erawh Slipknot chuan show an ṭan dawn thung.

Red Hot Chili Peppers hi an phur tawh hle tura rin a ni a, an guitarist John Frusciante chuan nikum December thla khan a vawi thumna atan an band a zawm leh ta bawk nen, mipui pawhin an nghahhleh ber zinga mi an ni.

Sonic Temple festival-ah hian band inlan tur an lian hlawm hle. A chunga hming kan tarlan tawhte ringawt pawh khi hmulthi tiding thei ṭhah an nih tawh laiin band tam tak inlan tur zingah Bring Me The Horizon, Evanescence leh Deftones-te pawh an tel. Chumai a la ni lo, Anthrax, Staind, The Pretty Reckless leh Alter Brigde-te pawh an la awm a ni.