Adam Levine-a'n a fan-te hnenah ngaihdam a dil

American singer Adam Levine chuan Chile-a Viña del Mar International Song Festival hmuna an band Maroon 5 concert-a 'technical problem' avanga duh ang taka an zai ṭhat theih loh avangin a instagram kaltlangin a fan-te ngaihdam leh hriatthiamna a dil.  

February 27 khan Ame­rican pop rock band Maroon 5 hian Chile-ah concert an nei a, an concert hi fan-te beisei a phak loh hle a; hei vang hian fan-te chuan an sawisel zui bawk. Hengte avang hian band vocalist Adam Levine chuan an band ai­awh­in ngaihdam a dil ta a ni. 

"A hmasain Chile-a kan band min sawm avangin lawmthu ka sawi a, kan zai ṭan dawn khan technical problem a awm thu kan hria, kha vang khan duh ang tawk a ṭhain kei leh ka band-te chu stage-ah khan kan rawn che thei lo a ni," tia a sawina video Levine chuan IG-ah a post.