No.1-ah Malsawmdawngkimi 'A lokal thuai dawn'

Zote Honda Ṭhazual Fakna chart-ah roreltu thar an awm a, chu chu Malsawmdawngkimi hla 'A lokal thuai dawn' a ni.

Pahnihnaah hian Ocean Avenue 'Lalpaah lawm la' tih awmin, Amtea 'Lunghlu' chu pathumnaah a awm.

Malsawmdawngkimi hla 'A lokal thuai dawn' tih hi Ṭhazual chart-ah a mikhual tawh lo hle a, tihchhuah a nih hnu lawk aṭangin chart hi a luahlum nghal a ni.

Hun eng emaw chen chart-ah hian a lang tawh a, chart tihchhuah apiangin hma a sawn emaw tih tur a ni a, tunah erawh dinhmun ṭha ber a luah ta a ni. Thlan a hlawh hle tih a chiang a, TV lamah pawh a zai hmuh tur a awm deuh reng a, mipuiin an hlut tih a chiang.

Kolasib nula Kimdongi hi Mizo Idol aṭangin Zoram mipuiten kan hriat a ni a, a zaithiam zia sawi nawn a ngai lo. Eng hla pawh sa se a sa thiam em em vek mai niin a lang. Tuna chart-a pakhatna a nihpui 'A lokal thuai dawn' hi B Puia Zaiawi leh PL Engmawia-te phuah a ni a, music ṭang ṭha tak mai hi Hruaia Cz kutchhuak a ni thung. Recording leh music video hi Aichhung Records & Visual kuthnu a ni bawk a, en pawh a manhla hle reng a ni.

Chart-a pahnihna dinhmun luahtu Ocean Avenue 'Lalpaah lawm la' hian a dinhmun a sawh nghet zel a, chart leha an din­hmun tur hriat a chakawm tawh hle a ni.

An hla 'Lalpaah lawm la' hi hla thar a ni lo a, Kristian hlabuah pawh a awm, kum tam tak liam tawha J McGranahan phuah a ni. Hla thi thei lo a nihna hi a hlutna tak a ni a, Ocean Avenue-te hian a music mawi taka arrange-in an rawn thar thawh leh a, ngaihthlak a ninawm loh hle.

Pathumnaah hian chart-ah ṭum hnih ngawt pakhatna dinhmun luah theitu Amtea 'Lunghlu' chu a awm ve ta thung a, he hla hit tak mai hian hun eng emaw chen chu chart a la luah a rinawm.  Palinaah hian Esther Khiangte 'An eng reng ang' chu a rawn invawrh bawk a, chart hmasaah khan pasarihnaah awmin tunah hian hma a rawn sawn hle. The Prophets chuan an hla thar  'Mangang Authawm' hmangin pangana dinhmun an luah a, anni pawh hian hma an sawn hle a ni.

Ṭhazual chart faknaah hian hmel thar hmuh tur pahnih a awm a, chu chu Thawhlehnaniropuia 'I tan ka hlan e' leh Lalremruati (Naemi) 'Intlansiakna'-te an ni a, anni hi pasarihna leh pakuanaah an awm a ni.