Box Office-ah The Lion King Ro-in ro a rel zel

Kartawp Box Office-ah The Lion King (2019) bawkin ro a rel leh a, Simba lalna chhuhsak thei an la awm lo.

Disney movie The Lion King (2019) hi tlangzarh a nih karah khan July thla chhunga movie, sum lalut hnem ber a ni nghal a, kar liam ta kartawpah khan US Box Office aṭangin $76,621,553 a lalut tling a, a la hlawhtling rem rem hle a ni. Tlangzarh a nih karah khan $mtd 191 zet a lalut nghal a, kumin chhunga film chhuak sum lalut hnem zingah a lang phak nghal. A sum hailuh tawh zawng zawng hi $mtd 962.7 a tling phak tawh a, The Lion King (1994) in sum a hailuh zat chu a pha thuak tawh.

The Lion King (2019) script hi Jeff Nathanson ziah a ni a, Walt Disney Pictures produce niin, Jon Favreau chu director leh producer a ni bawk.

Film thar, comedy-drama film Once Upon a Time in Hollywood chu kartawp Box Office-ah pahnihna a rawn ni nghal a, boruak a rawn nei lian nghal hle.

Once Upon a Time in Hollywood hi a changtute en reng reng pawhin hlawhtling lo chi a ni lo ve bawk a, a film hming ang deuhin a starring-te pawh an hrawl hle. Leonardo DiCaprio, Brad Pitt, Margot Robbie, Emile Hirsch, Margaret Qualley, Timothy Olyphant, Austin Butler, Dakota Fanning, Bruce Dern leh Al Pacino-te an ni ṭhuau a, a nep thei lo.

Spider-Man: Far from Home chu pathumnaah a awm ve ta a, ngam loh pahnih a tawng ta a ni. Toy Story 4 pawh palinaah awmin, Crawl chu panganaah a awm ve bawk. Box Office top 10-ah hian thil inthlak dang­lam nasa em em a awm lo a, Once Upon a Time in Hollywood tih loh hi chu kar hmasa lama lang phak vek an ni hlawm. 

Hetihlai hian kumina thawm nei lian ber Avengers: Endgame chu Top 10-ah langpha tawh lo mah se 11-na a la ni fan a, sum a la hailut tam hle.