Thlasik box office muthlu kaithotu Tom and Jerry

Thil danglam tam thlen meuh lohna North America Box office-ah Tom and Jerry pakhatna a ni a, $14,110,000 lai a lalut. Thlasik box office ngurchuai tak mai chu Tom and Jerry hian a rawn chawk harh leh a ni ber.

Chloe Grace Moretz, Michael Pena, leh Colin Jost-te channa Tom and Jerry hi hripuiin khawvel a chawhbuai tak tak hnua film tlangzarh zingah North America box office-a sum lalut tam ber dawttu a ni.

Wonder Woman 1984 khan $maktaduai 16.7 a lalut a, chumi dawt chu Tom & Jerry hi a ni a, theatre 2,475 aṭangin $14,110,000 hi a lalut. Hripui leng vangin khawvela film industry lian ber ni ṭhin North America box office chu a tlahniam nasa hle a, khawchhak dragon muthlu China erawh a parvul hle thung. Chutiang karah chuan North America  box office-a Tom & Jerry-in hetiang zat a lalut thei hi khawthlang lam media-te chuan an tarlang uar thiam hle.

Tom and Jerry hian ram dang aṭangin $25,600,000 a lalut bawk a, chumi nen chuan kar tawp liam taah khan $39,710,000 lai khawvel pumah a lalut a ni.

China ramah erawh chuti tehchiamin an hlut lo niin a lang thung. Kar tawp liam ta chhung khan $mtd 12.4 lai chu lalut tho mah se an ram Box Office chart-ah pangana a ni pha ṭawk.

Khawvela film industry lian ber ni mekah hian an ram kut chhuak comedy film 'Hi, Mom' chu pakhatna a ni a, tun kar tawp liam taah khan $mtd 53.3 lai sum a lalut. Detective Chinatown 3 chuan $mtd 19.7 lalutin pahnihna a ni a, Endgame chu pathumna niin A Writer’s Odyssey chu palina a ni ve bawk.

Tom & Jerry hian A Writer’s Odyssey sum lakluh chu $8,000 vel chiahin a pha lo a ni. China-ah hian a dinhmun sang lua lo mah se North America nena khaikhin chuan a sum lakluh zat erawh a inthlau lo hle. Khawthlang ram lianah khuan theatre hawn a la tam loh chu thuhran, a mipui hrim hrim pawh khuan theatre an la pan ngam meuh lo zawng a ni e.

The Croods: A New Age chu pahnihna a ni a, theatre 1,912 aṭangin $1,254,660 a lalut. Tom and Jerry nen chuan an sum lakluh a inthlau rem rem hle a ni.

The Little Things chu pahnihna niin $930,000 a lalut a, Wonder Woman 1984 chu palina ni thungin $705,000 a lalut ve bawk. The Marksman chu top 5 khartu a ni a, Golden Globes Awards 2021-a che ṭha tak Nomadland chu parukna a ni thung.

Box Office Mojo chart-ah film 32 tarlan a ni. Hrilen hma kha chuan film za chuang fe he chart-ah hian tarlan a ni ṭhin. 

Chung film 32 zingah chuan film thar pali a awm a, pakhat chu pakhatna ni mek Tom and Jerry hi a ni. Chu bakah chuan 11-na Crisis, 20-na My Zoe leh 21-na The Vigil-te chu film thar a ni bawk.