Oxygen mamawh lo thilnung Scientist-te'n an hmuchhuak!

Scientist-te chuan tunhnai lawk khan jellyfish ang chi, parasite chi khat mitochondrial genome nei lo an hmuchhuak. 

An thilnung hmuhchhuah hi multicellular organism zinga mitochondrial genome nei lo an hriat hmasa ber a ni. A awmzia chu a thaw (breathe) ve ngai lo tihna a ni a, a nihna takah chuan  oxygen hmang miah loin a nung tihna a ni.

An thilnung hmuhchhuah thar avang hian scientist-te chu an phur hle a, khawvela thil nung awmdang chungchang an hriatfiah dan tidanglam thei tur a nih ringin, khawvel pawna thilnung awm zawn chungchangah pawh hei hian hmasawnna a thlen an beisei hle.

He thilnung hi Israel-a Tel Aviv University scientist-te hmuhchhuah niin a hmingah  Henneguya salminicola tih an vuah.

Hemi chungchang hi Thawhlehnia an tihchhuah Proceedings of the National Academy of Sciences Journal-ah an tarlang a ni. 

Henneguya salminicola hi sanghaa awm ṭhin parasite niin, a tirah chuan oxygen hmang ve tho a nih an ring a, hunkal zelah a dam khawchhuahna tura a 'evolve'-naah hian oxygen tel loa nun hi a zir ta nia ngaih a ni. Tel Aviv University-a evolutionary biologist Dorothée Huchon chuan," An tissue, an nerve cell, an muscle, engkim an hloh tawh a.......tunah chuan an thawk theihna pawh an hloh tawh a ni," tiin an nihphung inthlakdanglam 

dan a sawi.

Engtin tak nge oxygen tel lo chuan an nun theih tih erawh an la hrechiang thei lo a, mahse an 'host' aṭanga chakna an neih aṭangin a nih an ring tih Huchon chuan a sawi a ni.