Chapchar Kut urlawkna Chapchar Music Festival

Chapchar Kut hma zan, February 28 hian 'Chapchar Music Festival' chu FM Resort-ah buatsaih a ni dawn.

Live music ngaina tana kal loh phal loh ni turin band ṭha tak tak an inlan dawn. Zai tur zingah Evenflow, Scavenger Project, Empee's (Dream Hunter Muanpuia), Jeff & Empy, Stacy's Penitence, This Chord leh Mood Swingers-te an tel.

He hun buatsaihtu darBu Events chuan kum tinin he hun hi Chapchar Kut hma ni/zanah buatsaih ṭhin an tum. darBu Events hotupa Fredy Ngila chuan, "Chapchar Kut hi kan hlut chho zel a, state pawn leh ram pawn aṭangin khualzin kan nei ṭhin. Heng mite leh Mizo ṭhalai nawlpui hian Lammual programme ringawt hi chu an kham khawp lo a, kum tina neih chhoh tur, chhim manhla taka buatsaih kan tum a ni," a ti.

Kumin hi a bul ṭanna a nih avangin darBu Events chuan hmun lian vak loah buatsaih an tum a, FM Resort hi World Bank Road-a Chite Lei bula filling station thar hnung chiaha awm a ni. Luh man Rs 200 a ni dawn a, a duh apiang tan chhim theih a ni.