Alia Bhatt a ṭawng chhuak ve ta

Bollywood star Alia Bhatt chuan Ranbir Kapoor nen an inkar a ṭha vak lo nia an sawi chungchangah thu leh hla a nei ve ta a, engkim a ṭha vek niin a sawi. 

Alia Bhatt leh Ran­bir Kapoor-te hi tun hnaiah an inkar boruak a ṭhat loh avangin an inṭhen nia sawi a awm a, sawi neuh neuh pawh a tam hle. Amah­erawhchu an mahni ber an ngawih tlat avangin thu chiang hriat tur a awm lo a, rin thu an insawisiak a ni ber. 

Hemi chungchangah hian Alia Bhatt chu a ṭawngchhuak ve ta nge nge a, Ranbir Kapoor nen inhmuh thiam lohna an neih loh thu a sawi. Kum 25 mi 'Raazi' star chuan, "Engkim a ṭha vek a, Valentine's Day pawh hlim takin kan hmang a ni. In mi duhsakna avangin lawmthu kan sawi e," tiin a sawi a, fans lam pawh an thaw huai ang le. 

Bollywood superstar Ranbir Kapoor hi Katrina Kaif nen kum ruk chhung zet an inzui hnuah an inṭhen a, Alia Bhatt lam a hawi leh nghal a, nikum aṭang khan an inzui ṭan a, an chanchin hian ngaihven a hlawh hle a ni. 

Ranbir Kapoor leh Alia Bhatt-te hi kumin Decem­ber thla-a tichhuah tur 'Brahmastra'-ah an changdun a, he film-ah hian Amitabh Bachchan leh Mouni Roy-te nen an changho dawn a ni.