The Highland Voice: Top 10 result a hriat ta February 28 zanah final dawn

UK-a reality show lar tak The X-Factor-a inlan tur thlanna 'The Highland Voice' chuan a vawrtawp a thleng dawn hnai ta. February 23, Inrini zan khan top 10 result puan niin, mi 14 an tling. 

Final hi February 28 zanah Folkland Park-ah neih tur a ni dawn a, mi 14 te hi an intihsiak dawn a ni. Heta ṭang hian a ti ṭha zual mi panga thlan an ni ang a, UK-ah a thlawna an zin theih dawn bakah - X-Factor-ah an inlan thei dawn cheu bawk a ni. 

February 19 & 20 zan khan Folkland Park-ah semi-final neih a ni a, mi 25 an zai. Heta ṭang hian top 10 thlan niin, mi 14 zet an tling. Contestant te hi Zoram mipuiin an zai kan lo ngaihthlak fo tawh leh, lar tak tak te an nih hlawm avangin top 10-a heti zat an lang hi thil mak a ni lo!

Final lut zingah hian - Lalruatpuii, Lawmi Khiangte, Vanlaltlansaa, Lalnunpuii Hauzel leh R. Lalhmangaihzuali (Zualboihi) te an tel a, Mizoram Talent Hunt 2018-a pakhatna Jose­phine Lalruatfeli pawh a la awm cheu bawk. Anni bakah hian zai lama talent nei ṭha tak tak an la kat nuk bawk a ni. 

Sap hla hmanga intih­siakna The Highland Voice hi February 6 khan ṭan a ni a, audition round-ah mi 60 an inlan. Chung zinga mi 25 te chuan audition an paltlang a, heta ṭang hian top 10 thlan leh a ni. 

Top 10-te hi February 28 zan hian an intihsiak leh dawn a, final a ni nghal tawh dawn a ni. Top 10 aṭang hian a tiṭha zual mi panga thlan chhuah a ni dawn a - September thla-a X-Factor-ah intih­siakna hmachhawn turin hmalakpui an ni ang.