Avengers: Endgame Avatar khum turin $mtd 102 chiah a mamawh tawh!

Khawvela film hawlhtling ber nih inchuh boruak a nung thar zel a, Avatar dinhmun a him tawh lo hle. Avengers: Endgame sum lakluh a pung chhoh zel a, record thar siam turin $mtd 102 bak a mamawh tawh lo. 

Film expert-te chuan End­game hian Avatar a phak thuai an ring a, engtianga rei nge hun a mamawh dawn tih chu hriat chakawm tawh tak a ni. Tun anga a kal tluang chho a nih chuan ni rei lote chhungin a khum theih a rinawm a, khawvela film hlawhtling ber ni thei dinhmunah a ding mek. 

James Cameron vs Russo 

Mi tam takin khawvela film director ropui ber ang hiala an chhal chu James Cameron a ni a, hnial chi rual lah a ni hek lo. Canadian filmmaker hian record chhuanawm tak a nei a, khawvela film hlawhtling ber pahnih - Titanic leh Avatar-te chu a kutchhuak an ni. 

Titanic hian hun eng emaw chen sum lalut hnem ber din­hmun a luah a, amah khumtu hi Cameron-a kutchhuak tho Avatar a ni. Hei hian Canadian filmmaker James Cameron ropui zia a tarlang chiang hle.  Avengers: Endgame chhuah hma kha chuan heng film pahnihte hi sum lalut hnem ber pahnih an ni a, tunah erawh Russo Brothers kutchhuak Endgame hian an record hi a rawn thaichhe chho mek a ni. 

American film director lar Joe leh Anthony Russo-te unau hian April 26 khan fantasy/sci-fi movie Avengers: Endgame hi an tichhuak a, an thlen chin apiangah ro an rel a ni ber. Thla tam pawh a liam hmain Titanic record a khum a, Avatar a hnaih chho zel bawk. An sum lakluh zat inthlauhna hi $mtd 100 vel chauh anih tawh avangin James Cameron tan ngaiṭha taka en liam chi a ni tawh lo. 

Forbes magazine chuan  Endgame hian $tld 2.7 lalut turin $mtd 102 chauh a mamawh tawh tih a tarlang a, Avatar rorelna a tawp hnai tih a tarlang. Hetih rual hian May 29 khan Godzilla: King of the Monsters tlangzarh a nih avangin Endgame sum lakluh hi thlahniam thei dinhmunah a ding mek a, hun a mamawh rei deuh dawn tih an tarlang.  

Hei mai hi a la ni lo - John Wick: Chapter 3 - Parabellum leh Aladdin-ten North American Box Office an thunun mek a, hei hian a sum lakluh tur eng emaw zat a pawtpeng ve mek bawk. Hetih rual hian Hollywood star rual channa Avengers: End­game hi chuti maia boruak dai chi a ni lo a, khawvel ram hrang hrangah thawm a la nei lian hle. Robert Downey Jr., Chris Evans, Brie Larson leh Scarlett Johansson-te channa film hian khawvela film hlawhtling ber Avatar khum turin harsa lo takin $mtd 102 a lakluh theih a rinawm. 

1. Avatar - $tld 2.78 

2. Avengers: Endgame - $tld 2.69

3. Titanic $tld 2.18