Clean & Green Revolution din a ni ta

Kan rama thing leh mau chereu nasa lutuk vengtu tur leh ramngaw dinthar leh kawnga hma latu tur Clean & Green Revolution chu June 1, Inrinni zan khan official-in din a ni ta. 

Clean & Green Revolution launching programme hi Zarkawt Recreation Centre-ah neih a ni a, an pawl chairman  Lalmalsawmi (Pi Mali) chuan a kaihruai a - C. Luri'n hunserh a hmang. He hun hi Rongura Hrahsel, Assistant Conservator of Forest chuan a hmanpui a, power point presentation a nei a ni. UD & PA aṭangin Lalrinthari Zadeng leh R. Lalnuntluanga, sanitation expert-te chuan power point presentation an nei bawk. 

Clean & Green Revolution hian a tum ber chu kan rama thing, mau leh ramngaw chereu mek siamṭha a, a tam thei ang ber thingphun a ni. Kan ram­ngaw leh nungchate uluk taka enkawl te, kan ram lui uluk zawka enkawl leh a lo thianghlim leh theihna tura hmalak te a ni. Hei bakah hian kan khawlai leh kan ram chhunga bawlhhlawh thenfai leh bawlhhlawh kan paihdan chungchanga nasa taka zirtirna hmun hrang hranga pekte chu an hmalakna turte a ni. 

Clean & Green Revolution hian June 5 (Nilaini) hian World Environment Day pualin thing eng emaw zat an phun nghal dawn a ni.