Zote Honda Ṭhazual Fakna-ah Mawitei Ralte a mawi ber

Mawitei Ralte chuan 'Lalpa min vengtu' tih hla hmangin Zote Honda Ṭhazual Fakna chart-ah dinhmun sang ber a luah. 

Mawitei hi chart hmasa lamah khan pahnihna a ni a, tun ṭumah erawh tuma tluk rual lohin No. 1 a hauh a ni. Stacy VL Muanpuii chu pahnihna-ah a awm ve thung a, Arini, Cindy leh Zorina-te chu top 3-ah an inhlangkai ve bawk. 

Mawitei Ralte hian April thla khan 'Lalpa min vengtu' tih hla hi a tichhuak a, Zonet leh MDM YouTube channel lamah a music video hi en leh ngaihthlak tur a awm. A tir aṭangin Ṭhazual chart-ah kan hmu nghal chat a, thla khat a liam meuh chuan dinhmun sang ber a kai ta hial a ni. 

He hla hi H. Neihchungnunga phuah a ni a, Mawitei hian a sa 'mawi' takzet a - tunlai fakna hla thlan hlawh ber a ni pawh hi a mak lo. Chart hmasa lama pakhatna hauhtu Stacy VL Muanpuii chuan 'I rinawm ropuizia' tih hla hmangin pahnihna a hauh a, mipuiin an la ngaithla kham lo. Ṭhazual chart-ah a lang rei ta viau a, kian zai a la rel thei meuh lo bawk. 

'Praise On' star Arini, Cindy leh Zorina-te zaithiam zia sawi nawn a ngai lo. Tunhnai khan an pathum hian music video an siam a, 'Nunna thar' tih a ni. He hla hi ngaihthlak manhla tak a ni a, a mawizia hria apiangin an ngaithla nawn leh ṭhin!

Ṭhazual chart-ah top 3 an kai hi an tan tawpna a la ni lo ang tih a rinawm a, dinhmun sang ber luah turin theihna an nei. Hma pawh an sawn chak hle a, chart hmasa lamah khan pangana a ni a, No.1 kai turin hma bak an nei eng hle. 

Luangmual tlangval Zela Chuaungo chuan palina a hauh a, a hla hit 'Lunghlu' hlutna a chuai tak tak thei lo. Amtea chuan 'Lunghlu' tih hla hmang vekin pangana a luah a, Malsawmdawngkimi leh Lalthlengliani-ten an dawt. Tun ṭumah hian Ocean Avenue, Esther Khiangte leh R. Lalruatsangi-te chu top 10-ah an lang bawk.