Miss Congeniality Nunui Rualhleng

June 2, Pathianni zan khan Sahara Star, Mumbai-ah Miss India 2019 Award Night neih a ni a, he hunah hian Miss India Mizoram 2019, R. Lalnunthari (Nunui) chuan Miss Fashion Icon leh Miss Congeniality sub-title a la a ni. 

Miss Fashion Icon hi Mumbai khawpui an thlen ni aṭanga an inchei dan en a teh a ni a, interview an hmachhawn bawk. Miss Congeniality hi chu contestant-te'n an khingpui zinga an duh ber an thlan a ni a, a hlu zual hle. Contestant-te mai ni lo hian judge-ten an nungchang an en hnuah an thlang chuak a, Nunui Rual­hleng hi Miss Congeniality atana thlan a ni ta a ni. 

Nunui Rualhleng hi Miss Talented dawng thei tura thlan chhuah 10 zing­ah a tel bawk a, mahse a vanduai ta a ni. Miss Getaway Goddess title pawh he hunah hian sem a ni a, Nunui hi YouTube lamah viewer nei tam ber ni mah se Miss India Nagaland-in a la ta a ni. 

Nunui chuan sub-title pahnih a dawn chung­changah, "Mizoram mipuite min thlawp leh min ṭawngtaipuinaah ka lawm takzet a, heng sub-title pahnih hi ka ngaihhlut ber pahnih an ni a; ka dawng thei hi ka lawm takzet a ni. Miss Getaway Goddess-ah kan video ṭhahnemngai taka min view sak tute zawng zawng chungah lawmthu ka sawi a, title la lo mah ila entu nei tam ber kan nihna kha a ropui em em a ni," tiin a sawi. 

Miss India 2019 Grand Finale hi June 15 hian Mumbai-ah neih a ni ang.