91st Oscar Award: Award la hnem ber 'Bohemian Rhapsody' Best Picture atan 'Green Book' thlang

Film khawvela chawi­mawi­na ngaihhlut ber Oscar Award chu nimin zing khan a vawi 91 nan Dolby Theatre, Los Angeles, California-ah ropui taka sem a ni ta. 

Drama/biography film lar Bohemian Rhapsody chuan award pali a hui a, chawimawina dawng hnem ber a ni. Hetih lai hian award ngaihhlut ber pakhat Best Picture chu Green Book-in a la ve thung. Thawm nei lian pahnih - Roma leh Black Panther-te chuan award pathum ve ve an la bawk a ni. 

Tun ṭum Oscar-ah hian Roma leh The Favourite-te chu award dawng thei tura chawpchhuah zinga langsar ber an ni a, category 10 zetah an lang. Vice leh A Star Is Born-te pawh langsar viau mah se, chawimawina an dawn tak erawh pakhat ve ve chauh a ni! Hei tak hi Oscar hlutna tarlangtu leh tingaihnawmtu pakhat chu a ni. 

Award ceremony hi kum 1989 hnua a vawi khat nan host awm loin buatsaih a ni a, hei pawh hi hriatreng a ni tawh ang.  

Oscar sem a nih hma hauh aṭanga thawm nei lian chu British rock band lar 'Queen' lead vocalist Freddie Mercury chanchin tarlanna Bohemian Rhapsody a ni a, beisei ang ngeiin a che ṭha bawk. He biography film hian award hlu tak tak pali a la a, award la hnem ber a ni. 

Award a lakte hi - Best Film Editing, Best Sound Editing leh Best Sound Mixing-te a ni a, Freddie Mercury lema chang Rami Malek chu Best Actor atan thlan a ni bawk. 

Bohemian Rhapsody hi editing lamah a chungnung hle a, hlawhtlinna an chan theihna kawngah hian audio engineer - John Warhurst leh Nina Hartstone-ten fak an phu hle a ni. Chutih rual chuan American film director lar Bryan Singer sawi hmaih theih a ni lo bawk, ani hi film pumpui khaikhawmtu a ni. American actor Rami Malek-a'n a chanvo a hlenchhuak ṭha a, Best Actor atana thlan a ni pawh hi a phu hle a ni. 

Tun ṭum Oscar-ah hian award pathum la thei film pathum an awm a, chungte chu - Roma, Black Panther leh Green Book-te an ni. 

Comedy-drama film lar Green Book chuan award ngaihlut berte zinga mi Best Picture a la a, Best Original Screenplay atan thlan a ni bawk. American actor Mahershala Ali kutah Best Supporting Actor award hlan a ni bawk. 

Mexican film star Yalitza Aparicio leh Latin Lover-te channa Roma chu Best Foreign Language Film atan thlan niin, Best Cinematography a la bawk. He drama film siamtu Mexican film director lar Alfonso Cuaron chu Best Director atan thlan niin, film industry-a chawimawina ngaihhlut ber a hawn. 

Nikum January 29-a tangzarh Black Panther chuan Box Office pawn lamah pawh a chet ṭhat chhunzawmin, award hlu tak tak - Best Production Design, Best Costume Design leh Best Original Score-te a la. Award an lak theihna kawngah hian American costume designer Ruth E. Carter leh Swedish composer Ludwig Goransson-te hming sawi hmaih a thiang lo bawk. 

Nikum Decdember thla-a tlangzarh Spider-Man: Into the Spider-Verse chu animation huanga langsar ber niin, Best Animated Feature award hlan a ni. Spider-Man: Into the Spider-Verse hi Marvel superhero film zinga Oscar dawng thei hmasa ber a ni a, dahhniam chi rual a ni lo. Hetih lai hian Best Animated Short Film ṭha ber atan Bao chu thlan a ni thung. 

Animation piah lamah hian - First Man, Vice leh Skin-te chu award dawng zingah an tel. First Man hian Best Visual Effects a la a, Best Docu­mentary Feature atan Free Solo thlan a ni. Vice chuan beisei phak lo mah se award dawng zingah a tel pha tho a, Best Makeup and Hairstyling a la a ni. Hetih lai hian Best Live-Action Short Film award chu Skin chuan a la ve thung a ni. 

Music a ni emaw film industry pawh nise award sem a nih tawh chuan Lady Gaga hming lam rik a ni ṭhin. Tun ṭumah pawh American singer hian a vawi khat nan Oscar Award a la a, tun hnaia award sem hrang hrangah chawimawina dawngtu zingah a tel thei zel a ni. 

Kum 32 mi Lady Gaga hi lemchan khawvelah chuan mi thar mai a la ni a, award erawh a dawng nual tawh. 'A Star Is Born' star Gaga hian American actor Bradley Cooper nena an sak 'Shallow' hmangin a vawi khat nan Oscar a dawng a, award hlu bik a ni ngei ang. 

Lady Gaga leh Cooper-te sak 'Shallow' hi Best Original Song atan thlan niin, film industry-a chawimawina ngaihlut Oscar Award dawngtu zingah an hming ziahlan a ni ve ta a ni. 

Cooper leh Gaga-te hi Best Actor leh Best Actress dawng thei tura chawpchhuah zingah an tel bawk a, award dawngtu zingah erawh an tel pha ta lo a ni. 'A Star Is Born' hi category pasarih zetah chhawpchhuah niin, award pakhat chauh a la thung. 

'A Star Is Born' star Cooper leh Gaga tan lawmna tur dang erawh a awm tho a, award ceremony-ah hian live-in an perform dun. An hla hit 'Shallow' ngei mai an thlawh a, entu mipui thawm a ring ṭha rem rem hle a ni. An perform lai hi Cooper-a kawppui Russian supermodel Irina Shayk pawhin mipui zing aṭangin a lo thlir a ni. 

91st Oscar Award-ah hian India film 'Period. End of Sentence' chu chawimawina dawng zingah a tel a, Bollywood tan chanchin lawmawm tak a ni. Nikum April thla-a tichhuah Period. End of Sentence hi Best Documentary Short atan thlan niin, film khawvela chawimawina ngaihlut ber a dawng ta rup mai a ni. 

Period. End of Sentence changtute pawhin lawmpuitu an ngah hle a, Bollywood titi a luah hneh hle. Lawmpuitu zingah hian - Priyanka Chopra leh Akshay Kumar-te pawh an tel a, Hollywood star - Reese Witherspoon leh Padma Lakshmi-te pawhin an lawmpui thu an tarlang a ni. 

Award ceremony hi British rock band lar Queen chuan an kick-off a, an vocalist Adam Lambert a chepui rem rem hle. Queen hian 'We Will Rock You' leh 'We Are the Champions' an medley a, mipui lawm an hlawh hle a ni. 

Perform zingah hian - Bette Midler, Jennifer Hudson, Gillian Welch leh David Raw­lings-te pawh an tel a, mipui lawm ber erawh Lady Gaga leh Bradley Cooper-te an ni. 

Oscar dawng thei tura ṭum hnih an lo thlan tawh American singer Bette Midler chu a kum tam deuh tawh mah se a la duai lo hle. Jennifer Hudson pawhin 'I’ll Fight' a sa ve bawk. Gillian Welch leh David Rawlings-ten lawm an hlawh a, Lady Gaga leh Bradley Cooper-te perform a hmuhnawm viau bawk.