Artist 100 chart-ah BTS an invawrh sang

Billboard chart hrang hrangah Olivia Rodrigo a langsar leh ber a, Album 200 chart-ah Morgan Wallen 'Dangerous: The Double Album' bawk pakhatna a ni leh. Chutih rual chuan Artist 100-ah K-Pop superstar BTS chu pakhatnaah an rawn invawrh thung a, kar hmasaa pakhatna Taylor Swift nen an dinhmun a inthlak chiah a ni.

Member pasarih awmna K-Pop group hi kar hmasaah khan Artist 100 chart-ah pangana an ni. He chart-ah hian kar 229 lai an lang tawh a, an hun tam ber chu a sang lamah an hmang bawk.

An LP 'Be' deluxe edition an tlangzarh thar vangin Artist 100 chart-ah hian pakhatna an rawn ni leh a, Artist 100 topper hi kar 16 an nihna chiah a ni tawh a, Artist 100 chart topper ni tam thei ber pawl an ni der tawh a ni.

Nikum December kum tawp lama Dynamite an tlangzarh aṭang khan Billboard chart-ah hian an hming a lang deuh reng tawh a, tunah hian Artist 100 chart-a group anga pakhatna ni ngun ber an ni mek bawk.

Taylor Swift chu kar 46 lai he chart-ah hian topper a ni tawh a, Drake chu kar 31 lai ni tawhin The Weeknd chu kar 20 a ni tawh bawk a, BTS hi kar 16 an ni ve chiah bawk. Group anga chart topper ni rei ber an nih piah lamah hian an ni rei lawr lak a ni.

Artist 100 chart-a No.1 ni ngun zual te:-

1    Taylor Swift    Kar 46

2    Drake    Kar 31

3    The Weeknd    Kar 20

4    BTS    kar 16

5    Ariana Grande    Kar 15

American tleirawl Olivia Rodrigo 'Drivers License' chu a la lar chhunzawm zel a, Billboard Global 200 leh Billboard Global Excl. US-ah a zawnin kar sarih pakhatna a ni tawh.

Artist 100 chart-ah pawh kar sarih chhung a lang tawh a, tunah hian 16-na ni mekin pathumna dinhmunah pawh a lo ding hial tawh a, hla pakhat chiah la tichhuak siin hetiang dinhmun duhawmah hian a ding thei a ni. Drivers License hi vawi maktaduai 63.5 lai stream a ni der tawh a, Disney+'s High School Musical: The Musical: The Series star hi a la lar chhunzawm zel dawn niin a lang.

Billboard Hot 100 chart-ah pawh Olivia Rodrigo 'Drivers License' bawk hi pakhatna  a ni leh a, he chart-ah hian a zawnin kar sarih chhung pasarihna a ni tawh. Ramdang chart-ah pawh a che ṭha hle a, UK-ah pawh kar sarih chhung No.1 a ni tawh a ni.

Billboard 200 chart-ah chuan Morgan Wallen 'Dangerous: The Double Album' tho pakhatna a ni leh a, kar sarih chhung pakhatna  a ni ta. Pahnihna chu Ariana Grande 'Postions' kha niin pakuana aṭangin pahnihnaah a rawn invawrh leh a ni.

Pop Smoke 'Shoot For The Stars Aim For The Moon' chu pathumnaah a rawn inhlangkai ve leh bawk a, Lil Durk 'The Voice' chu palina niin Pooh Shiesty 'Shiesty Season' chu pangana a ni thung.