Hontrade International Ṭhazual Fakna: A chung berah Peter Lalnunpuia

Mizo Idol 2018 aṭanga Zoram mipuiin kan hmel­hriat Peter Lalnun­puia chuan 'Tlanglamah khian' tih hla hmangin a vawi khat nan Hontrade International Ṭhazual Fak­na chart-ah No.1 a hauh. 

Chanmari West tlangval Peter-a hian nikum November thla khan a music video hmasa ber a tichhuak a, Ṭhazual chart-ah pawh a inlar nghal. Zawi zawia hma sawnin tunah chuan dinhmun sang ber a rawn luah ta a ni. 

Petera music video hmasa ber hi Tea video production kutchhuak niin recording hi Studio A16-ah tih a ni a, Thangboiha'n track hi a siamsak bawk. 'Tlang lamah khian' tih hla hi BS Vanlalvena lehlin a ni a, Peter-a hian Mizo Idol intihsiak lai pawh khan a lo sa tawh a ni. 

Tun ṭumah hian Kolasib nula Malsawm­dawngkimi chu pahnihna a ni a, Rualthansanga Khiangte chu pathumna a ni. Dawngkimi hi 'A hnen pan la' tih hla hmangin Ṭhazual chart-ah hun eng emaw chen chu a inlar tawh a, mipuiin a zai an ngaithla kham thei lo a ni. Hetih lai hian chart hmasa lama pakhatna hauhtu Rualthansanga Khiangte chu pathumna-ah a awm ve thung a, a dinhmun a chhe ta duai e tihna erawh a ni lo. 

Lalremruata Fanai leh Sangtei Renza-te chu top 5-ah an lang a, Stacy V.L Muanpuii leh Lalchhuahsanga-ten an dawt. Sangtei Renza hian 'Malsawmna' tih hla hmangin pangana hi a luah a ni. Kumin bika No.1 hauh thei hmasa ber Stacy V.L Muanpuii pawh 'Thlen ka nghakhlel' tih hla hmangin chart-ah a inlar zui zel a a ni. 

Tun hnaia music video siam thar Champhai nula H. Lalremruati chuan Ṭhazual chart-ah hmun pawimawh a luah nghal. Mizo Idol star Remruati hi a hla thulkhung 'Mawi tawp berin' tih hla hmangin top 10-ah a inhlangkai a ni. Tun ṭumah hian Lalrem­ruata leh Sawmtea-te chu top 10-ah an lang bawk. 

1. Peter Lalnunpuia - Tlanglamah khian

2. Malsawmdawngkimi - A hnen pan la

3. Rualthansanga Khiangte -  Hal loin 

4. Lalremruata Fanai - Krista Thisen

5. Sangtei Renza - Malsawmna 

6. Stacy V.L Muanpuii - Thlen ka nghakhlel

7. Lalchhuahsanga - Ka kiangah awm reng rawh 

8. H. Lalremruati - Mawi tawp berin 

9. Lalremruata -  Tute nge?

10. Sawmtea - Ka awin Pathian chu ka auva