YouTube-a viewer tld 6 nei tling hmasa ber Luis Fonsi & Daddy Yankee 'Despacito'

American video-sharing website 'YouTube' hi February 14, 2005 khan San Mateo, California-ah tlangzarh a ni a, tunah chuan khawvela video share-na lar ber a ni. YouTube-ah hian video tluk­leh­dingawn eng emaw zat upload a ni tawh a, chung zinga viewer ngah ber chu Luis Fonsi leh Daddy Yankee-te hla hit 'Despacito' a ni.

Despacito hian February 24, Pathianni khan viewer tluklehdingawn ruk a nei tling chiah a, world record a siam!

Luis Fonsi leh Daddy Yan­kee-te hian 'Despacito' hmang hian world record ṭum sarih zet an lo siam tawh a, a vawi riat nan Guinness World Record bu-ah an hming ziah lan a ni leh ta a ni. 

Puerto Rican singer Luis Fonsi leh Daddy Yankee-te hian kum 2017 khan 'Despacito' hi an tichhuak a, hetiang reng reng hian an hlawhtling ang tih an ring phak kher lo mai thei. Amaherawh chu kum tam pawh a vei hmain record chhuanawm tak tak eng emaw zat an siam a, khawvel pian tirh ata la awm ngai reng reng lo thlengin an tawngbaw ta a ni. 

'Despacito' hi January 12, 2017 khan YouTube-ah upload a ni a, nimin thleng khan viewer 6,005,762,790 zet an awm tawh a ni. Heting zata tam video entu hi an la awm ngai loh avangin a na mai lo hle. 

'Despacito' hian YouTube-a viewer tld 3 nei tling hmasa ber record a lo siam tawh a, hmei hnu hian tld 4, 5 leh 6 nei tling hmasa ber a siam zui zat bawk. A thlen chin a piang hi record thar a ni zel tawh a, khum thei an awm ang em tih pawh zawhna chhan har tak a ni rih!

Luis Fonsi leh Daddy Yan­kee-te hi 'Despacito' chhuah hma kha chuan music khawvelah langsar berte zinga mi an ni lem lo a, tunah erawh thil a dang lam ta. Music huanga chawimawina ropui tak tak 20 chuang zet an dawng tawh a, chawimawi an phu tih hai rual a ni lo. 

Chawimawina an dawn tawh zingah hian -  Latin Gram­­­my Award, Teen Choice Award, Billboard Music Award, Billboard Latin Music Award leh iHeartRadio Music Award-te pawh a tel a, 'Despacito' hi ṭum eng emaw zat 'Song of the Year' atan thlan a lo ni tawh bawk. 

•    Mi 1,300,000,000 chuang zetin an hmang mek. 

•    Minute tinah video darkar 300 vel zel upload ziah ang a ni! 

•    Ni khatah video tld 5 vel en ziah ang a ni.

•    Ni khatah mi tld 5 velin YouTube an hmang ziah. 

•    YouTube hmangtu tam ber chu kum 18-49 inkar an ni. 

•    Kum 2025-ah chuan ṭhalai zingah TV aiin a tlaknat zawk rin a ni.