Bradley Cooper kianga perform nuam ti Lady Gaga

American singer Lady Gaga chuan Bradley Cooper nena perfrom dun chu nuam a tih thu sawiin, "Hei aia special hi a awm chuang lo," tiin a sawi. 

'A Star is Born' star Lady Gaga leh Bradley Cooper-te hian Oscar Award-ah khan 'Shallow' an perform dun a, mipui lawm an hlawh hle a nih kha. An khawsak dan aṭang pawhin nuam an tidun hle tih a lang a, sawi neuh neuh pawh a awm phah hial a ni. 

Heimi chungchang hi Lady Gaga chuan sawichhuakin, "Oscar-ah hei aia special hi a awm chuang lo - ṭhian ṭha tak leh talent nei ṭha tak bula hun hman chu a nuam dangdai hle a ni," tiin, Bradley Cooper a dahsan thu a sawi.

Oscar Award hi Thawhṭanni zing khan Dolby Theatre, Los Angeles-ah sem a ni a, kum hmasa aiin entu mipui an tam zawk. Kum 2018 khan award ceremony hi mi maktaduai 26.5 velin an en a, kuminah erawh mi maktaduai 29.6 zetin an en a, kum hmasa aia entu punna hi 12% zet a ni. 

Oscars hi entertainment hungah chuan entu ngah ber pawl niin, Super Bowl chiah tluk loh a nei a ni. Oscar entu tam ber ṭum chu kum 1998 kha niin, mi maktaduai 55.2 zetin an en a, hemi ṭum hian Titanic chuan Best Picture a la a ni.