Godzilla: King of Monsters a lal ber

British actress Millie Bobby Brow channa Godzilla: King of Monsters chuan North American Box Office-ah Aladdin a nek chhuak a, roreltu a ni.

Tun hnaia film chhuak thar Rocketman leh Ma-te chu sum lalut tam zingah an tel a, John Wick: Chapter 3 - Parabellum leh Avengers: Endgame-te chu top 10-ah an lang ve leh bawk. 

Film khawvelah God­zilla a mikhual tawh lo a, a chhuak thar ber King of Monsters pawhin thawm a nei lian hle. He fan­tasy/sci-fi film hi May 29 khan France-ah tlangzarh a ni a, khawvel ram hrang hrang a tuam chho mek. 

Sum tamna North America-ah chuan tun weekend chhung khan $mtd 49 zet a lalut a, Box Office-ah No.1 a hauh nghal. American film director lar Michael Dougherty kutchhuak film hi tun hnaia film chhuak thar zingah chuan boruak nei lian ber tih ngam a ni a, eng chen nge ro a rel dawn tih chu hriat chakawm tawh tak a ni. 

King of Monsters hian kar hmasa lama sum lalut hnem ber Aladdin a khum a, an sum lakluh erawh a inthlau lo hle. British film director Guy Ritchie-a kutchhuak, Canadian actor Mena Massoud, American actor Will Smith leh British actress Naomi Scott-te channa film hi May 22 khan tlangzarh a ni a, tun weekend chhung khan $mtd 42.3 zet a lalut leh a - pahnihna a hauh. Box Office aṭang a sum lakluh hi $mtd 255.8 zet a tling tawh bawk. 

Tun hnaia Hollywood film chhuak thar Rocketman leh Ma-te hi an sum lakluh a inthlau lo hle a, Rocketman a chungnung hret. Rocketman hian $mtd 25 a lakluh laiin, May 30-a release thar Ma hian $mtd 18.3 a lalut a ni. Hetih rual hian he thriller/psychological horror film 'Ma' hian beisei a phak loh a tih theih thung a, a sum lakluh hi a chuti teh lua lo.  

John Wick: Chapter 3 - Parabellum erawh hralh a kal zui zel a, $mtd 11.1 zet a lalut phak. Avengers: Endgame pawhin tun weekend chhung khan $mtd 7.8 a lalut ve leh a, Avatar a hnaih zel. Endgame sum lakluh tawh zawng zawng hi $tld 2.71 zet a tling tawh a, Avatar ($2.78) umphak turin hun ṭha a nei zui zel. 

Tun ṭumah hian Pokemon Detective Pikachu, Booksmart, Brightburn leh The Hustle-te chu sum lalut tam zual zingah an tel bawk.