'Bharat' release dawn vangin Katrina Kaif muhil thei lo!

Mizote chuan ṭawngkam mawihnai tak kan nei a, phur lutuk avanga awm hle hle thei lote hi 'helhhawlh' kan ti ṭhin. Katrina Kaif pawh a channa film 'Bharat' tlangzarh a nih dawn avangin a 'helhhawlh' a, zanah pawh a muhil thei tawh lo!

Kumina Bollywood film chhuak tur zinga ngaihven hlawh ber tih ngam Bharat chu vawiin hian tlangzarh a ni dawn a, a changtute lam pawh an phur tawh hle. He drama/action film-ah hian - Katrina Kaif, Salman Khan, Tabu, Disha Patani leh Jackie Shroff-te an inlan a, khawpui hrang hrangah a vuak hot-na an nei kual nasa hle. 

Kar kalta Inrinni khan Mumbai-ah media an hmachhawn a, hemi ṭum hian Katrina Kaif chuan a awm dan dik tak a sawi chhuak. British actress Katrina Kaif chuan, "Ka phur tawh takzet a, zanah pawh ka muhil lawk thei ṭhin lo. Mipui feedback ka hre chak tawh takzet a, ka nghakhlel tih bak sawi tur pawh ka hre lo," tiin a sawi. Box Offce-ah a thlensan a rin leh rin loh an zawhna chu, "Sawi lawk a harsa khawp mai, min duhsaktute zarah sang tak thlen ngei kan beisei," tiin a chhang bawk. 

Bharat film hi Indian film director lar Ali Abbas Zafar kut­chhuak a ni a, Bollywood star lar ber ber an inlan bawk avang­in boruak a nei lian hle a ni.