BET Award-ah Cardi B perform dawn

Kumtina sem ṭhin Black Entertainment Television (BET) Award chu June 24 hian sem a ni leh dawn ta a, perform tur ṭhenkhat hming puan a ni tawh. 

Chung zingah chuan American rapper Cardi B pawh a tel a, ani bakah hian zaithiam dang eng emaw zat hming a lang. 19th BET Award-a perform tur hi tun hnai khan puan a ni a, a thawh khatnaah hian - Cardi B, Lil Nas X, Billy Ray Cyrus, DJ Khaled leh Migos-te hming a lang. H.E.R., Lizzo, Mustard, Lil Baby, Yung Miami, Lucky Daye leh Kiana Ledé-te chu inlan tur zingah an tel bawk a, perform tur hi an la awm belh dawn cheu bawk. 

Cardi B hi nominee zingah pawh a langsar ber a, category pasarih laiah a lang. Drake chu award panga dawng thei dinhmunah a ding ve mek a, Beyoncé, Travis Scott leh Bruno Mars-te an langsar viau bawk. BET Award hi Microsoft Theatre, Los Angeles-ah sem a ni dawn a, American actress Regina Hall chuan a host dawn a ni.