CMT Music Award-ah Carrie Underwood a ropui

Country music huanga award ngaihlut ber pakhat CMT Music Award chu nimin zing khan Bridgestone Arena, Nashville-ah sem a ni a, Carrie Underwood chuan award hlu tak pahnih a hlawh chhuak. 

American singer hian Video of the Year award a la a, Female Video of the Year atan thlan a ni bawk. Kane Brown, Keith Urban, Julia Michaels, Dan + Shay leh Luke Combs-te chu award dawng zingah an tel bawk. 

Carrie Underwood hian kum­in April thla khan a studio album parukna 'Cry Pretty' a tichhuak a, a hlawhtlinpui hle. A album title 'Cry Pretty' hi May thla khan a official music video a tichhuak zui bawk. 

He 'Cry Pretty' hmang hian Video of the Year a hlawh chhuak a, CMT Music Award-ah chawi­mawiin a awm. Video of the Year hi award ngaihhlut ber pakhat a ni a, Carrie Underwood kuta hlan a ni pawh hi a mak lo. Carrie Underwood hian 'Love Wins' hmangin Female Video of the Year a hlawh chhuak bawk a, mimala langsar ber a ni. 

Mipa lamah Kane Brown a langsar a, Male Video of the Year a la. Kane Brown hian 'Lose It' hmangin award a hlawh chhuak a, a ropuina sawi nep chi rual a ni lo. 

Keith Urban leh Julia Mi­chaels-te chuan Collaborative Video of the Year an la a, Group Video of the Year chu Zac Brown Band kutah hlan a ni. Dan + Shay chuan 'Speechless' hmangin Duo Video of the Year an hlawh chhuak a, Ashley McBryde chu Breakthrough Video of the Year award hlan a ni thung. Luke Combs leh Leon Bridges pawh an hawihil bik lo a, CMT Performance of the Year award an dawng.

Video of the Year    :    Carrie Underwood 'Cry Pretty'

Male Video of the Year    :    Kane Brown 'Lose It'

Collaborative Video of the Year    :    Keith Urban feat. Julia Michaels 'Coming Home'

Female Video of the Year    :    Carrie Underwood 'Love Wins'

Group Video of the Year    :    Zac Brown Band 'Someone I Used To Know'

Duo Video of the Year    :    Dan + Shay 'Speechless'

Breakthrough Video of the Year    :    Ashley McBryde

CMT Performance of the Year    :    Luke Combs & Leon Bridges