Jonas Brothers album thar 'Happiness Begins'
American pop rock band lar Jonas Brothers chuan an studio album pangana 'Happiness Begins' chu nimin khan an release ta rup mai.
An album thar hian fan-te a barakhaih hle a, an rin aia hmaah an nghak chhuak. Album chungchang hi sawi ri zauh zauh mah se tianga hmaah hian an tichhuak ang tih an ring phak lo a, fan lam pawh an phur hle.
Re-union album
Nick Jonas, Joe Jonas leh Kevin Jonas-te hian kum 2005 khan 'Jonas Brothers' band hi an din a, kum rei lote chhungin music khawvel an deng chhuak. Ṭhalai zingah an tlana hle a, lar pawh an lar vet vet hle.
Amaherawhchu, 2013 khan an kehdarh a, band angin an inlan zui lo vang vang. Fan lamin re-union nei turin an duh em em a, inzawm khawm leh mai tur anga sawi pawh an ni fo. Hetiang a nih mek lai hian kumin February 28 khan comeback video 'Sucker' an tichhuak a, fan-te'n an nghahhlelh em em re-union chu a thleng ta.
An comeback video 'Sucker'-ah hian an kawppuite ṭheuh - Priyanka Chopra (Nick Jonas), Sophie Turner (Joe Jonas) leh Danielle Jonas (Kevin Jonas)-te pawh an lang a, fan-te tuihalna a chhawk chiang hle. Hemi hnu lawk hian 'Cool' an tichhuak leh bawk a, hemi ṭum hian album thar chungchang hi sawirik ṭan a ni.
Thla tam pawh a vei hmain hla 14 zet awmna, re-union hnua an album hmasa ber ni bawk 'Happiness Begins' chu an tichhuak ta a ni. He album-ah hian - Sucker leh Cool-te pawh hi telh a ni a, hla dang 12 zet a kengtel bawk a, chung zingah chuan 'Comeback' tihte pawh a awm nawk a ni.