Kum li hnuah Cooper leh Shayk an inṭhen

Milar an ni a, sum lah an ngah - an tlakchham awm chhun nia lang chu 'hmangaihna' a ni. American actor Bradley Cooper leh Irina Shayk-te chu an fanu kum hnih mi fahraha awm tur pawh pawisa loin an inṭhen ve leh ta. 

Russian supermodel Irina Shayk hi US dollar maktaduai 4.5 man, Pacific Palisades mansion-a an chenna-in aṭangin a inpu chhuak a, a pasal Bradley Cooper lak aṭangin a inthiarfihlim a ni. An inṭhen thu hian media a luah hneh hle a, a chhan ni thei awm hrang hrangte pawh an zeldin nasa hle.  

Kum 44 mi Bradley Cooper leh Irina Shayk (33)-te hi 2015 aṭang khan an inzui ṭan a, fanu kum hnih mi Lea De Seine Shayk Cooper an nei. Tun hnai thla khat kalta vel aṭang khan an inkar hi a khi ṭan tih an sawi a, an inṭhen ta nge nge a ni. An inṭhen chhan hi tarlan ni lo mah se American singer Lady Gaga hming lam rik a ni a, ani hi an inkarah a tla zep ni awmin an sawi. Cooper leh Gaga-te hi 'A Star Is Born' film-ah khan an changdun a, an inhnimhnai hle tih thawm a awm a, finfiahna tak erawh a awm lo. 

Bradley Cooper hian 2016 khan American actress Jennifer Esposito chu nupui-ah a lo nei tawh a, thla li hnuah an inṭhen! Hemi hnu hian British model Suki Waterhouse nen an inzui leh a, rei daih loin an in ban leh bawk. Hetih lai hian Russian model lar Irina Shayk hi footballer lar Cristiano Ronaldo bialnu hlui a ni a, 2010-2015 chhung kha an lo inzui tawh a ni.