Myanmar 'Angel' thihnain ngaihven a hlawh

Sipaiin mipui rorelna an chhuhsak avangin kan ṭhenawm ram, Myanmar chu an buai mup mup a, nitin maiin sipai rorelna duh loin tualchhung mite chuan nawrh an huaihawt hut hut reng mai a ni. Nilaini khan duh lohna lantirtu mi 38 lai an thi a, democracy tana martar zingah chuan Angel pakhat Kyal Sin a tel ve a, chu Angel thihna chuan Zoram ṭhalaite rilru pawh a hneh hle tih social media-a an post hrang hrang aṭangin hai rual a ni lo.

Engkim a ṭha lo 

March 3, Nilaini zing a her chhuak a, chumi niah chuan Myanmar ram mipuite chuan Democracy tundin a nih leh theihna atan te, Aung San Suu Kyi chhuah a nih theihna atan te nawrh an huaihawt leh ngei dawn tih khawvelin a hria a, an ram chanchin ngaihven ranin khawvel ram hrang hrang media-te pawhin beng an chhi uluk hle.

Nawrh huaihawt zawm ngei tumin tleirawl kum 19 mi, Kyal Sin, Angel tia an koh bawk pawh chu a insiam a, a T-Shirt duh tak mai 'Everything Will Be Ok' tih inziahna ngei mai chu a hain, nawrh huaihawtna lam chu a pan ta a, engkim a ṭhat vek erawh a ring hauh si lo.

Chu tleirawl, Angel-i chuan a nunna thapin nawrh huaihawtnaah chuan tel a ngai tih a hria a, mahse zam hauh loin Mandalay kawtthlerah chuan a ke a pen chhuak a ni. A ipteah chuan a blood type leh a contact number inziahna a ak a, thuziak,"Ka thi a nih chuan, ka taksa bungte hi mamawhtute tan in lo pe dawn nia," tih chu a ak tel bawk.

Nawrh huaihawtnaah chuan police nen an innawr buai ta a, police silai hmeh puah chuan chu tleirawl duhawm tak lu chu a fuh ta hlauh mai a, a thih pha ta hial a ni. Angel-i thihna chuan khawvel a deng chhuak a, social media-ah a thlalak a darh nasain a thih hmaa a chevel video leh thlalak chu mi tam tak rilru hnehtu a ni ta a ni.

Kyal Sin-i bula nawrh huaihawtnaa awm ve Myat Thu chuan a bula tleirawl huaisen tak awm chanchin chu heti hian a sawi.

"Police-te'n silai an hmeh puah khan, 'Ṭhu rawh, silaimuin a fuh ang che. Stage-a awm ang mai alawm i nih le,' tiin min hrilh. Midang kha a ngaihsak em em a ni. "Police-te khan a tirah chuan tear gas an hmang phawt a, a hnuah silaimu an hmang leh. Nawrh huaihawtte chu an darh hak a, chumi hnu chuan hmeichhe pakhat a thi tih thu an rawn sawi leh a ni. Tunge thi tih chu ka hre mai lo a, mahse a hnuah ka hre leh ta a ni," tiin a sawi.

Myat Thu leh Angel-te hi taekwondo class aṭanga inhria an ni a, Angel kha  martial art thiam tak a nih piah lamah Mandalay-a DA-Star Dance Club-ah a tel bawk. Social media lamah pawh a lamna video-te pawh a dah ve ṭhin nghe nghe.

A vawi khatna atan Myanmar inthlan hnuhnung berah khan vote a thlak tih social media lamahte pawh a lo post a, a ram tana a tih tur a tih thu a ziah bawk.

A ṭhian pakhat Kyaw Zin Hein chuan Angel-i hnen aṭanga a message dawn hnuhnung ber social media-ah a tarlang. "Hei hi ka sawi theih tawp ber a ni mai thei. Ka hmangaih lutuk che. Theihnghilh ngai suh," tih a thawn chu.