Instagram khelmualah Virat Kohli-a'n century a siam
Khawvela khawmualpui zau ber Asia khawmualpuiah hian milar tam tak an awm. Chung milar zingah chuan Indian cricketer lar Virat Kohli chuan follower a ngah ber. Thawhṭanni liam ta thleng khan Instagram-ah mi maktaduai 100 chuangin an follow tawh!
Asia celebrity zingah ani ang renga follower ngah hi an la awm ngai lo a, amah hnaih bertu nen pawh follower an inngah hlei rem rem hle. Bollywood superstar Priyanka Chopra chu Virat Kohli dawttu a ni a, mi maktduai 60.8-in an follow. Pathumna chu Shraddha Kapoor niin mi mtd 58 chuangin an follow ve bawk.
Instagram-a follower ngah ber chu Portuguese footballer Cristiano Ronaldo a ni a, mi mtd 266 zetin an follow. Ariana Grande chu mi mtd 224-in follow-in Ronaldo dawttu a ni a, WWE superstar Dwayne Johnson, Lionel Messi leh Neymar-te an hnung a indawtin an zui thla bawk. Virat Kohli hi parukna a ni.
International Cricket Council (ICC) chuan an twitter-ah hemi chungchang hi tarlangin "Virat-Kohli- cricket star zinga Instagram-a follower maktaduai 100 nei tling hmasa ber" tiin an tweet hial!
Instagram chauh a ni lo
Virat Kohli hi Instagram-ah chiah hian a che ṭha lo. Twitter-ah follower mtd 40.8 neiin a Facebook page chu mi mtd 36-in an like bawk. Kum khat liam taah khan Kohli hian IG-ah hian follower mtd 50 vel a nei a, kum khat chhungin follower mtd 50 chuang a neih belh leh a ni.
India ram celebrity zinga 'most valuable celebrity'-ah February thla tirah khan puan a lo ni tawh. A brand value chu $mtd 237.7 angin an chhut sak a, Hindi film actor- Akshay Kumar leh Ranveer Singh-te chuan an dawt a ni.