June 25-ah 'BTS World' mobile game

Korean boy band BTS-te larzia sawi nawn a ngai lo - an hming chawiin mobile game hial siam a ni ta. June 25 hian 'BTS World' mobile game chu US-ah tlangzarh a ni dawn a, a tukah khawvel hmun hrang hrangah tlangzarh a ni zui bawk ang. 

He mobile game hian soundtrack a keng tel dawn a, chungte chu BTS original music vek a ni ang. Music piah lamah hian tih tur hrang hrang a keng tel nual dawn a, a 'free' vek a nih dawn bawk avangin BTS Army-te tan chuan lawmna tur hlir a ni. He mobile game tihlar nan hian - Jin, Jimin leh Jungkook-te hlasak chu tlangzarh a lo ni tawh bawk. 

'BTS World' mobile game hi BTS official website-ah a mini-game demo a awm tawh a, a khel chak zual tan chuan in register lawk theih a ni. He game hi South Korea-a game siam chhuaktu lian ber Netmarble Corp. -te duan a ni a, anni hian BTS nena thawkdun Big Hit Entertainment-ah pawh share lian tham tak an nei a ni.