Vanglaini logo

Mizo lengkhawm zai thiam ber Republic Veng

B. Daniala Memorial Inter Branch YMA Lengkhawm Zai Intihsiakah Republic Veng Branch YMA chu pakhatna an ni a, cheng nuai khat leh nomawi an dawng. Tuithiang chu pahnihna an ni a, pathumna chu Tuikual North an ni.
Kar kalta Zirtawpni zan khan CYMA Hall, Tuikhuahtlangah leng­khawm zai intihsiak final hi neih a ni a, inelna hmachhawn branch 39 aṭanga a thiam 10 thlan chhuahte an inlan a ni.

Republic Veng hla latu Lalremtluanga (khuang te) leh Tuithiang khuangpu Lalrinzuala (khuang pui) te chu khuangpu ṭha berah thlan an ni a, Tuithiang nula Lalrimawii Hnamte chu hla hril thiam berah thlan a ni bawk. CYMA hnuaia branch hrang hrang inelna a nih angin member thawkchhuak tam ber hnenah lawmman pek a ni a, Nauselin an dawng. Nausel Branch YMA-ah hian member 116 an awm a, tun ṭum inelnaah hian member 44 thawk­­chhuakin 37.93% an inlan a ni. 

An intluk tlang
Lengkhawm zai intihsiakah hian Branch tinin hla chuam an nei vek a, preliminary round-ah an hla chuam leh hla thlan sa pahnih 'Khawvelah hian lungngai fate' leh 'Phungrual an ṭin ang a' tih aṭanga pakhat zawk sain final-ah hian an hla sak loh ṭheuh hi an sa thung.

Final-ah branch pariatin 'Phungrual an ṭin ang a' tih hla an sa a, chung zingah chuan pakhatna Republic Veng pawh an tel. Republic Veng convener PC Lalnunmawia chuan, "Kan intluk tlang vek tawh a, chuvangin vannei tur chuan engkima kan ṭhat a ngai. Final hmachhawn tur hian kan luh dan thlengin kan duang a, veng chhung kan inlungural em em a, kohhran ṭha­lai thlengin min thlawp ṭha. Chutih rualin pakhatna kan nih chhan tak erawh Pathian vang liau liau a ni," tiin Vanglaini a hrilh.

SRS thla hual nan
Republic Veng Branch YMA president Lalchhuangliana chuan, "Pakhatna nih hi kan inbei­sei ngam lo a, kan nih tak­ah chuan kan va lawm tehlul em. Mizote tan chuan YMA hi a hlu em em a, khawtlang nun siamṭha tu a ni a, engkima engkim a ni. Ruihhlo do kawnga CYMA hmalakna kan thlawp a, an hnuaia awm SRS hnathawh hi a ropui kan ti. Kan lawmman dawn cheng nuai khat aṭangin Rs 10,000 hi SRS thla hual nan kan hlan," tiin a sawi.

Republic Veng Branch YMA hian nimin tlai khan SRS hnenah Rs 10,000 hi an hlan nghal a, an branch president Machhuanga chuan lengkhawm zai avanga veng chhunga inpawhna ṭha zawk awm chu lawmawm a tih thu Vanglaini a hrilh bawk.

CYMA buatsaih inelna hi Sound & Music Sub Committee-ten an buaipui a, May 28 - June 7 chhung khan neih a ni.